استقبلوا التازي ب(الورود) وهم نجيلة ما عندهم !!
قزاز ورذاذ
محمد الطيب الأمين
استقبلوا التازي ب(الورود) وهم نجيلة ما عندهم !!
* لم اتأكد من مقولة (سيد القروش بلقى الحنان مفروش) إلا بعد وصلو (كفيل المريخ) التازي.
* وجد التازي استقبالا ربما لا يحظى به حتى الملك محمد بن سلمان إذا زار السودان.
* فعلوا للتازي ما لم يتوقعه التازي نفسه.
* هو ذاتو اتخلع.
* بقى منطط عيونو.
* شي صالة كبار الزوار.
* شي لافتات.
* وشي ركشات.
* وشي باصات الوالي.
* وشي (ورود وزهور).
* صديقنا الفنان محمد عيسى مشي استقبل التازي وهو يحمل (بوكي ورد).
* ونحن (بوكي الورد) ده يا محمد عيسى ما شفناهو قبل كده إلا في المسلسلات المصرية.
* شفناهو في ليالي الحليمة بس.
* (الورد) ده جبتو من وين يا محمد؟
* غايتو التازي بيكون استغرب.
* انتو تقدموا ليهو في (الورود) ونجيلة ما عندكم.
* بس حكاية البوبار في بيت الإيجار.
* يصنع الصانعون وردا ولكن وردة الروض لا تضارع شكلا.
* وين (ورد) الاستاد؟
* حق (الورود) وايجار الباصات والبوبار ده لو صرفتوا على نجيلتكم دي كان (استادنا) ارتاح.
* البيشوفكم تقدموا في (الورود) يحلف يقول متصدرين مجموعتكم.
* (الورود) دي ما (ورود) فريق ماخد ليهو ٤ من فيتا كلوب.
* ولا (الزهور) دي (زهور) فريق ماخد ٣ من سيمبا و٣ من الاهلي.
* دي ما (ورود) فريق عندو نقطة.
* والله صحي.
* وأنا والله اكتر حاجة زعلتني لما شفت صورة التازي في شارع النيل.
* ودوهو أكتر حتة وسخانة في شارع النيل.
* قمامة واكياس واكوام طوب وحصحاص.
* معقولة ما لقيتوا حتة (أوجه) من الحتة دي؟
* نفترض إنو بلدنا دي وسخانة واصلا هي وسخانة، كان على الأقل الحتة القعد فيها التازي دي تنضفوها.
* زول خسر فيكم طيارة خاصة معقولة ما دايرين تخسروا حق النضافة؟
* حاجة تكسف.
* ساقوا ودوهو الاستاد.
* قالوا ليهو داك طابق شاخور ودي النجيلة الضاربة.
* لكن ما قالوا ليهو منو الشيد الإستاد؟
* كانوا تقول ليهو الإستاد ده عملوا لينا عمر البشير.
* استاد المريخ : (الجهة المنفذة للمشروع المؤتمر الوطني ، مقاول المشروع جمال الوالي).
* كان تقولوا ليهو المعلومة دي.
* الجماعة استغلوا زيارة التازي للاستاد وهتفوا ضد سوداكال.
* سوداكال ده واجعهم وجع.
* مع إنو هو الجاب ليهم التازي.
* سوداكال من أفضل الرؤساء الذين مروا على المريخ.
* وتعال اناقشك.
* جمال الوالي في ١٤ سنة خلاك من صغار أفريقيا.
* تطير من التمهيدي وتجري تفتش سيكافا.
* سوداكال شالك دخلك المجموعات.
* خلاك بقيت زي الهلال.
* جاب ليك الدوري تلاتة مرات تواليا.
* جاب ليك التازي الفرحان بيهو ده.
* مالو سوداكال عيبوا لي؟
* المهم.
* أهم حاجة التازي ده تسوقو تودهو استاد الهلال عشان يعرف المكان الاتاهلتو منو للمجموعات.
* ما تخموا ساكت.
* ورهو إنو نجيلتكم بتكون كويسة في فترة توقف الدوري وأول ما الدوري يبدأ النجيلة بتحرق.
* قوم على حيلك.
* نجيلة شغالة مع الصفارة.
* بتحرق مع صفارة انطلاقة الدوري وبتبقي كويسة مع صفارة نهاية الدوري.
* وغايتو جنس غايتو.
* الله يكفينا شر (المصدي) اللمعتو الأيام.
* و.. و..
* والبصر دون البصائر … والتازي ما ببقى تركي آل الشيخ.
ابوناصر كفو والله العظيم…الله يهني سعيد بسعيدة… لكن التازي عندنا رجل غالي جدا وكفاية تكبده المشاق وزيارة بلدنا الذي يحتضر نتيجة سياسات الدولة العميقة منذ ٣٠ سنة وبعدين يا العربي المسيخ الجوهراء الزريقاء دي انت نسيت انها اتنبت من دم مجوك واكول وبيتر دم اخواننا في جنوب السودان ومن مال الشعب السوداني الهبدو ليكم الحاج عطا المنان وحاليا المواسير من مضاربات السوباط ومرابحات الكيزان وشركات المتعافن ولو ما عارف أسأل حكامة الاسياد التي تنافس نفسها في السجع ومدح الشيوخ…بالله خليك في حدود احترام المريخ الكيان وبلاش تريقة وصفاقة وملام خارم بارم ما عارف اقيف على حيلك والاصفير وانت لا تساوي …. في من تكتب عنهم وتسبهم واصلا ٣٠ سنة سليمان محمد سليمان وظيفته تدمير المريخ ومعادلة الكفة ووقف تفوق المريخ لكن هيهات والأيام السوداء في انتظاركم وباكر ال الشيخ يهج يخليكم في الدفن واللغوثة والحفر وطبعا الهلال اكبر حفار قبور في العالم يقتل القتيل ويمشو في الجنازة هلال الملاليم وعجبي.
الرجل يستحق التكريم بما يليق به وقد قيل المريخ رجل صالح . يؤسفني أول مرة وآخر مرة لي تصفح هذا العمود الذي لم أستطع إكماله لركاكته ورائحة الحقد تفوح من بين سطوره ، الا تدري بأن النجيلة هي سبب زيارة الملياردير السوداني السعودي للسودان ، كل المريخاب يعلمون بالصدمة التي مني بها اصحاب الزريبة هذه الايام وهم يشاهدون الخبراء الأجانب بقيادة الملياردير يزورون الرجل الصالح الذي رفع اسم السودان في المحافل الدولية . خاب ظن أولاد فتحية (والنية زاملة سيدها ) . من الاحري ان تكتب عن الصفر الدولي الذي لازمكم منذ النشأة .