هلال رجب سوف يكون في الموعد

صابنها

محمد عبد الماجد

هلال رجب سوف يكون في الموعد

• يلعب الهلال اليوم اول مبارياته الافريقية في مرحلة المجموعات امام فريق صن داونز وهو من اقوى اندية افريقية واكثرها تنظيما واحترافا.
• صن دوانز وبحكم وجوده في جنوب افريقيا يعتبر اقرب الاندية الافريقية للمستويات (الاوربية) بحكم ان دولة جنوب افريقيا قريبة لاوروبا في السلوك والطباع وحتى الحياة.
• جوهانسبرج عاصمة (اوروبية) في دولة افريقية.
• جنوب افريقيا دي قربت يقولوا لينا يحدها من الجنوب فرنسا.
• مرقت بي بنط.
• البنط هسع عمل كم؟
• اي حاجة زادت.
• طارت السماء.
• يلعب فريق صن دوانز الكرة الحديثة والسريعة ، وهم اكثر الاندية بعدا عن الخروج من جو اللعب او الاستجابة لاستفزازات الخصم.
• فريق بارد.
• وما عندو ردة فعل خارج النص.
• ضابط اعصابو على الساعة.
• تربيتهم (اوروبية) في كل شيء.
• الله يوفق الهلال اليوم.
• الفريق الجنوب افريقي ينصرف كليا نحو (الكرة) ولا يبدد طاقته في امور لا تخدم قضيته (الفنية) في الملعب.
• وهذا شيء يمكن ان يكون سلاح ذو حدين في مباراة اليوم بالنسبة للهلال ، اي بمعني ان الهلال اذا انصرف مستضيفه للكرة فقط فان ذلك في صالحه ، لأن الهلال يفضل دائما ان ينحصر التنافس في هذا الجانب….الهلال يخسر دائما امام الاندية التى تتجه لاساليب اخرى في المباراة لتحقق الانتصار.
• مع التأكيد ان امكانيات صن دوانز في الجانب (الفني) كبيرة – وتركيزهم (فنيا) قد يرهق الهلال ، خاصة اذا لم يكن الهلال في يومه.
• نتمنى ان يكون الهلال اليوم في يومه وان يحالفه التوفيق ، من اجل ان يحقق الهلال انتصارا في مباراة اليوم ان شاءالله ، خاصة ان مباريات ام درمان يمكن ان تهددها المخاطر ، خاصة اذا كان الهلال سوف يلعب في ام درمان من غير جمهور.
• الله يوفق الهلال اليوم.
• الهلال يلعب اليوم امام صن دوانز في ملعب جيد وفي وجود تحكيم عادل او اننا نتوقع ذلك ، دون ان يكون للجمهور الجنوب افريقي وجود في مباراة اليوم.
• اذن لا خوف على الهلال فهو يخوض اول مباريات مرحلة المجموعات امام صن دوانز في اجواء مثالية.
• الانتصار اليوم او حتى التعادل – يجعل الهلال يلعب من اجل الصدارة ويمنحنا قوة ودفعة معنوية قوية.
• نسأل الله التوفيق لهلال الملايين – تنتظر شوارعنا تلك الفرحة الزرقاء – تترقب ابوابنا وشبابيكنا لذلك.
• الشوارع عاوزة تفرح.
• الشوارع فترت من (التروس).
• عاوزين نفرح.
• فترنا من الصفوف.
• اطفالنا – في المدارس وفي الاحياء – سوف يصاقروا التلفزيونات – عيونهم العسلية تتوقع انتصار الهلال.
• بحرسوا التلفزيونات زي (القطا).
• الليلة ما ح تكون في صفوف.
• لو مفتح امشي جيب (الرغيف) وقت المباراة.
• والله قرد ما تلقاه.
• شبابنا سوف يبقى مرابط على مواقع التواصل الاجتماعي – قبل المباراة واثناء المباراة وبعد المباراة ان شاءالله.
• يكتبوا بوست بوست.
• يا الله انصر الهلال.
• الكبار يفضلونها في الراديو – اليوم سوف يجددوا (حجار البطارية) وسوف يراجعوا الراديو.
• ح يشوفوا (الصلاحية).
• في راديو لو ما نفختو ما بيشتغل.
• وفي راديو إلّا تضربو عديل.
• لكن وقت الاذاعات بقت في الموبايلات (الروادي) استعدلت.
• بقت تشتغل زي الطلقة.
• الله ينصر الهلال الليلة.
• وفي ناس لغاية الآن.
• بعد العمر دا.
• ما بقدروا يحضروا المباراة.
• المباراة عندهم زي فحص الكورونا.
• يحوموا المباراة كلها.
• من دكان لي دكان.
• يقيفوا.
• ويرجعوا يدخلوا تاني.
• بتبقى ليهم حارة.
• زي الحقنة.
• ما عارفين يعملوا شنو؟
• يحضروها.
• وإلّا يسمعوا بيها بعد نهاية المباراة.
• الاتنين ما بقدروا عليها.
• بخافوا تفوتهم المباراة وجدعات الفيس واهداف الغربال.
• ولو كمان قالوا يقعدوا الكورة ما مضمونة.
• واعصابهم ما بتستحمل الحاجات دي.
• بقى ما عندهم صبر يبل الابري.
• ولا عندهم حيل للمهاجم وقت ينفرد ويضيعها.
• او وقت يقولوا ليك (كورنر).
• عليكم الله بعد العمر دا.
• وبعد كل الحاجات.
• والمصاعب.
• والدولار الطار.
• والرغيف البقى بالصف.
• والغاز المافي.
• لغاية الآن نحن ما بنستحمل (كورنر) على مرمى الهلال.
• في واحد هلالابي حلف لي قال لي والله انا الكورنر على الهلال في تمرين الهلال ما بستحملو.
• عاوزني استحملو في مباراة للهلال.
• في القارة الافريقية في مباريات تبقى (كلاسيكو) خاص.
• مباريات كبيرة.
• الهلال والاهلي المصري.
• الهلال والترجي.
• الهلال ومازيمبي.
• الهلال وصن دوانز.
• دي مباريات صعبة.
• طبعا اضافة الى مباراة الهلال والمريخ – مباراة من غير شيء بتحرق الاعصاب وتخليك ما عارف الباب بي وين؟
• تدخل البيت وتقعد تفتش في باب الخروج.
• تشيل القلم وتفتش الورقة.
• تلقى الورقة ، تقعد تفتش في القلم وهو في ايدك.
• عندنا زول في الحلة وقت الهلال يكون عندو مباراة بقعد يفتش عن (نضارتو).
• ما بخلي حتة.
• يقلب البيت قلب.
• فوق تحت.
• ما في (مرتبة) او (لحاف) ما بنكشو.
• الزول دا كان بقول والله (النضارة) فتشت ليها في اي حتة ، ما خليت شيء …الشيء الوحيد الما فتشتها فيه …عيونو.
• وفي النهاية بكون لابسها.
• النضارة قدام عيونو – وهو ما شايفها.
• بتحصل.
• وقت الهلال يكون عندو مباراة بتحصل حاجات عجيبة.
• عندنا زول صعب في الهلال.
• شفت عديل كدا.
• يوم مباراة الهلال بكورك للولد وبقول ليه : انت يا جنا الباب بتاع الشارع دا مالو بنطط براهو؟
• زي العتود.
• وعندنا زول وقت الهلال يكون عندو مباراة – بمشي لدكتور الاسنان بقلع ليه ضرس بدون ما يكون في وجع.
• بقلع ليه ضرس ويرجع.
• ووقت المباراة تكون صعبة بقلع ليه ضرسين.
• الليلة ما عارفو قلع كم ضرس.
• والله نحن الليلة مطمئنين.
• ما عندنا مشكلة.
• عندنا فريق قادر يتعامل مع كل الاوضاع.
• الهلال بشكله دا ما في زول بخاف عليه.
• حتى لو الهلال خسر لا قدر الله.
• طمعانين في الفوز.
• وعاوزين نرتاح قدام.
• ما عاوزين نفرط.
• اكسب الآن.
• بترتاح قدام.
• اول 3 نقاط يمكن ان تكون اسهل 3 نقاط.
• بكون ما في ضغوط.
• وما في حسابات.
• وما في اي مخاوف.
• عشان كدا احسن تكسب من بدري.
• الظروف ما معروفة.
• ولي قدام ما معروف يحصل شنو؟
• الله ينصر الهلال.
• قولوا يا رب.
• اقول ليكم شيء.
• تعالوا للمباراة بدون خوف.
• ادخلوها بثقة.
• ما بتجيكم الحبة.
• خلوها على الهلال.
• بنغلب حتى لو في الدقيقة 93.
• عاوزين نغلب.
• نغلب لينا فريق كبير.
• زي ما غلبنا مازيمبي.
• عاوزين نغلب صن دوانز.
• يا رب.
• الانتصار الخامس تواليا للهلال في البطولة الافريقية خارج القواعد.
• خاصة ان اليوم دا الليلة يوم عزيز علينا.
• قولوا يا رب.
• ………..
متاريس
• الليلة عيد الهلال.
• وزي ما التفت الزميل بدرالدين بخيت في موقع كوورة لهذا اليوم الذي تأسس فيه نادي الهلال 13 فبرائر 1930م.
• عيد سعيد للهلال.
• وانتصار اكيد ان شاءالله.
• الليلة كمان يوم عظيم.
• الليلة غرة رجب.
• والهلال اطلق عليه اسم الهلال بعد ان هل هلال رجب.
• هلال رجب لن يخذلكم.
• سوف يكون الهلال اليوم في الموعد ان شاءالله.
• رجب سعيد علينا.
• ومنتصرين ان شاءالله.
• ………..
• ترس اخير : بكرة الفرحة تشيلوها بالقفف.