تعب السنين

صابنها

محمد عبد الماجد

تعب السنين

• بعجبني عاطف خيري.. بيكتب القصائد زي (اللوكيشن) عشان في النهاية بتصل لنقطة محددة.
• وقت تصل بتمرق بي حاجة.
• بتفهم شيء.
• وحميد بوصلك قبل ما تتحرك.
• من غير ما تتعب – او يقوم نفسك.
• والزمن دا (النفس بيقوم) من غير سبب.
• ونحن جاريين متل (فار) الماوس – قالوا لينا المطرة (بت نقط) – قلنا ليهم المطرة (بت عمة) الموية….واخت (الكتاحة) بالرضاعة.
• وقفنا على الدرب (مشلهتين) ، لقينا الناس قاعدين يتغالطوا – متل (عيش الريف) ، رغم ان عيش الريف ما بتغالط.
• في واحد من غير مناسبة – قال والله محمد عبدالرحمن الغربال دا (خطير) اقوانو زي الحان عثمان حسين.
• تنزل منسابة – اشعر بيها في العروق متل (الجلكوز).
• في زول من الجماعة الكلام دا ما عجبو – قام من (العشاء) يتنفر في الناس – رغم انو اصلا كان ما في عشاء.
• حركة بس.
• زي الحكومة الجديد.
• قلنا ليه يا زول اقعد كمّل (عشاك) …ما تحرق دمك ساكت.
• الزول قعد – رغمو انو اصلا ما في (عشاء).
• قال لينا الليلة مالو (الفول) مسيخ كدا؟ – وهو محروق من اهداف محمد عبدالرحمن.
• واحد بالوادي.
• وواحد بالشنقيطي.
• كل واحد براهو.
• الحارس طلع من الموضوع.
• من غير مناسبة.
• والعشاء اصلا ما فيه (فول) – الفول نعمل بيه شنو مع (ازمة الرغيف) دي.
• غايتو (الفول) مع ازمة الرغيف إلّا تصور معاه (سيلفي).
• نحن بنتكلم ساي – زي الحكومة الجديدة.
• لا في فول نافع.
• ولا قرع.
• هسع ناس المريخ يزعلوا ويقولوا الزول دا قاصدنا بـ (القرع).
• وانا لا جبت سيرتهم.
• ولا قلت حاجة.
• اقول ليكم شيء.
• امشوا (الفيفا).
• اصلو الايامات دي البتهبشوا كلو بقول ليك بمشي (الفيفا).
• تقول الفيفا دي في الكلاكلة.
• في الساعة دي كانت في (كديسة) نطت في الشباك – دفقت (اللبن)…وعشان ما تتخلعوا اصلا كان ما في (كديسة).
• ولا في (لبن).
• انا بتكلم ليكم ساي زي الحكومة الجديدة.
• اللبن نجيبو من وين بعد ما اصبح بـ 100 جنيه.
• الواحد بقى عشان يشرب ليه شاي بي لبن إلّا يكون عندو (صرفة صندوق).
• تقعد تشرب في شاي اللبن – وانت بتتلفت زي كأنك بتشرب في حاجة تانية.
• الزول بقى ما يصدق.
• عاوز اقول ليكم شيء.
• الزول لو وقع فيه (صالون) ما يمشي للدكتور…والله قروش (الكشف) اصعب عليك من وقعة الصالون.
• اخير تنوم بالوقعة ساي.
• مالك ومال التلتلة.
• في واحد مشى للدكتور – وقعد يشكي ليه ..قال ليه والله يا دكتور انا لا باكل ولا بشرب ولا بنوم ولا بدفع قروش الكشف.
• الزول دا احسن ليه عدم الاكل وعدم الشراب وعدم النوم من دفع قروش الكشف.
• خلونا نخش على الهلال.
• ما تعمل لينا العمود كله (منعرجات).
• تطلع من موضوع وتدخل في موضوع زي الزول الاتعلم السواقة جديد.
• المهم.
• الهلال سافر جنوب افريقيا.
• تفتشوا لاخبار الهلال (دواء).
• الهلال دا وقت تجيب سيرتو تشعر بالراحة.
• وتحس انك شبعت من غير رغيف.
• وشربت قهوة من غير جبنة.
• ومرقت تقيف برة في الشارع.
• الوقفة برة في الشارع ما في داعي ليها في الحتة دي.
• ما عارف الخلاني اقول الكلام دا شنو؟
• نرجع للهلال.
• الكلام السمح.
• ما عارف ليه الناس شاعرة ان الهلال ح يحقق نتيجة ايجابية في جنوب افريقيا.
• الهلال يمكن يغلب عديل كدا.
• نحن عارفين فريق صن دوانز دا ما ساهل.
• فريق خطير.
• وكورته سمحة.
• لكن برضو عندنا ثقة كبيرة في الهلال.
• رغم ان الهلال في الفترة الاخيرة لم يقدم مستويات جيدة في مباريات الدوري المحلي.
• لكن بنتعشم الهلال يغلب في جنوب افريقيا.
• بنتوقع كدا.
• التعادل ممكن ما نقبل بيه.
• والله الهلال بشكله هذا – خلانا نرفع سقف الاحلام.
• امالنا.
• وطموحاتنا.
• بقت كبيرة.
• في حاجة مطمئنة جدا في جنوب افريقيا.
• الهلال امام صن دوانز سوف يلعب في ارضية ملعب ممتازة.
• والهلال وقت يلقي (النجيلة) سمحة ما عندو مشكلة.
• الهلال دا جيب ليه ملعب كويس ..واسألوا من النتيجة.
• غايتو نحن ما خايفين على الهلال في جنوب افريقيا.
• نتائج الهلال في جنوب افريقيا مشرفة.
• اندية جنوب افريقيا ايضا لا تتجه الى الاساليب غير الشرفة.
• الناس ديل بيلعبوا كورتهم بس.
• يا يغلبوك عديل.
• يا ما عاوزين.
• اندية جنوب افريقيا ما زي اندية شمال افريقيا – هناك النتائج تحسب خارج الملعب.
• اندية شمال افريقيا تستعمل حرب نفسية قبل المباراة وتجد دعم من الحكم ومساندة من الاتحاد الافريقي.
• صن دوانز لا يستعمل مثل هذه الاساليب.
• بيلعب كورته بس.
• والهلال اي فريق في افريقيا مهما كان اسمه بيلعب كورته بس ما بقدر يغلب الهلال.
• ادونا تحكيم صاح.
• وملعب جيد.
• واسألونا من النتيجة.
• ما بنسأل في بايرن ميونخ الالماني.
• مباراة الهلال امام صن دوانز تبقى ذات اهمية كبيرة – تحقيق نتيجة ايجابية في اول مباريات مرحلة المجموعات يعني ان الهلال وضع قدم في دور الـ 8 من اول جولة في مرحلة المجموعات.
• نحن عاوزين الهلال يحسم البطاقة الاولى ويترك البطاقة الثانية حايرة بين مازيمبي وصن دوانز.
• الفريق الجزائري ايضا يمكن ان يشكل خطر على المجموعة ويمكن ان يقتلع احدى البطاقات.
• عشان كدا ما في احسن من انك تحسم مبارياتك.
• ما عاوزين نكرر غلطة الموسم الماضية ونصارع على البطاقة حتى اخر جولة وفي النهاية نخرج بفارق نقطة.
• اغلب بس.
• عاوزين نتصدر.
• كل الاندية الافريقية التى نشاهدها الآن – الهلال قادر عليها.
• كلها.
• بما في ذلك الاهلي المصري.
• بس خططوا صاح.
• وما تفرطوا من البداية.
• احصدوا اكبر قدر من النقاط في الجولات الاولى عشان نرتاح قدام.
• وعشان ما يكون عندنا مشكلة.
• عاوزين نتأهل.
• فريق الهلال بشكله الحالي على الاقل يفترض ان يصل للنهائي.
• دا اقل شيء.
• ونحن اذا وصلنا للنهائي بنشيل الكاس.
• ما تقعدوا تصعبوا لي الحكاية.
• الموضوع بمشي.
• ما صعب.
• ما تخلوني ارجع ليكم تاني لبداية الكلام.
• واجيب ليكم سيرة (القرع).
• وانا عارفكم – ما بتحبوا تسمعوا سيرة (القرع).
• ان شاءالله تصب مطرة.
• ويكون حدها (النخرة).
• حليل مطرة زمان.
• وقت كانت بتصل (النخرة).
• هسع ما في حاجة بتصل النخرة غير (الضيق).
• الله يصلح الامور.
• ويعدلها.
• ويجيب لينا الحاجات السمحة.
متاريس
• مباراة الهلال القادمة امام مازيمبي.
• ما عاوزين اي لعب.
• جيبوا من برة.
• وشيلوا من جوة.
• ما تخلوا حاجة.
• اكتب قبل مباراة المريخ والشرطة.
• وما عارف الحاصل شنو؟
• بكرة نرجع ليكم.
• لكن بس عاوز اعرف طرامبيل شارك ام لا؟
• مجرد سؤال.
• ما تقولوا حاجة.
• الاهلي المصري كان طامع يغلب بايرن ميونخ.
• فريق القرن الافريقي كان عنده طموح.
• وقبل المباراة رتبوا لذلك.
• لكن اثناء المباراة اتضح ان الفروقات كبيرة.
• كورتنا الافريقية بعيدة.
• علقيتنا كلها واحدة.
• الناس ديل ما يخموكم ساي.
• ………..
• ترس اخير : ان شاءالله تنقط – وتصب عديل كدا.