الكرير ود سعد حلج الشامة

صابنها

محمد عبد الماجد

الكرير ود سعد حلج الشامة

• قاعدين لينا في كوم رملة – عيونا متل (التعاريف) ، قاعدين نفتح لينا موضوع موضوع عشان نتناقر فيه.
• في ناس (المناقرة) عندهم زي (الزلابية).
• لو ما اتناقروا ما بعرفوا يعيشوا.
• شغالين مناقرة من الصباح.
• دا يناقر في دا.
• لمن بقينا زي الخبر في صفحة اتنين.
• بقينا (ضعاف) من المناقرة الكتيرة.
• نحن قاعدين كدا – جانا شافع جاري – قال لينا سمعتوا الخبر؟
• قلنا ليه خبر شنو في البرد دا؟
• قالوا في انخفاض في درجات الحرارة!!
• قال لينا انخفاض شنو؟ الموضوع اكبر من كدا.
• قلنا ليه شكلوا الحكومة الجديدة.
• قال لينا يشكلوها او ما يشكلوها ما فارقة كتيرة.
• الحاجات دي كلها ما بتفرق مع (الاسماك) في الموية.
• السمك ما فارقة معاه – يحكم العسكر ..يحكم الكيزان ، يحكم حميدتي – يحكم حمدوك ، كله عنده واحد.
• مسكنا الشافع وعلقناه من اضنينو – وقلنا ليه خبرك شنو؟ عامل سنونك ديل متل مفتاح علبة الساردين.
• الشافع سنونو برة خشمو متل المهاجم (المتسلل).
• الشافع قال لينا الهلال بعد ما غلب مازيمبي ، ناس المريخ قرروا يقدموا شكوى في (الدالي).
• نزلنا الشافع وقلنا ليه و المريخ علاقتو شنو بالموضوع دا؟
• الشافع قال لينا والله انتوا ما جايبين خبر ساكت – والله ناس المريخ هزيمة مازيمبي وجعتهم اكتر من ناس مازيمبي ذاتهم.
• انتوا ما عندكم رأس.
• انتوا ما عندكم عقل.
• قالنا ليه
• كيف الكلام دا ؟ – شعرنا ان (الشافع) بقول ليه في كلام منطقي – حسينا ان الشافع دار أسو فيه حكمة.
• وعيونها كلاها كلام متل (الكيلون) بتاع الباب.
• اول مرة اعرف ان هناك علاقة بين الكيلون وكلام العيون.
• الشافع قال لينا لمن الهلال غلب مازيمبي – ناس المريخ النوم طار من عيونهم – أي مريخابي اليوم داك تمسكو يقول ليك (البعوض) – وهو واجعو فوز الهلال على مازيمبي.
• بعد مباراة الهلال ومازيمبي لقيت لي مريخابي واقف في صف الرغيف كان عاوز ليه (50) رغيفة …اول ما قالوا ليه الهلال غالب شاله رغيفتين وفات.
• قعدنا مع الشافع في الواطة – قلنا ليه الكلام دا كلو مفهوم ، وما عندنا فيه مشكلة – بس عاوزين نعرف ناس المريخ اشتكوا (الدالي) في مباراة مازيمبي في شنو؟
• الشافع قال لينا المريخاب قالوا كورة الدالي التى لعبها لمحمد موسى كانت (مبرومة).
• قلنا ليه طيب ما تتبرم – المشكلة في الحتة دي في شنو؟
• الفيفا حرمت يبرموا الكورة؟
• الكاف عندهم رأي في الحتة دي.
• قالوا ما تبرموها.
• كمال شداد طلع ليه قانون جديد – قال فيه أي كورة تتجاوز حدود الانبثاق العكسي في الوجدان الذاتي تعتبر مخالفة للائحة النظام الاساسي في اتحاد كرة القدم السوداني.
• يمكن.
• شداد ما في حاجة بعيدة عليه.
• علقنا الشافع من (اضنينو) تاني وقلنا ليه : انت وقت تقول ليك كلام – ابقى قولو عديل.
• الشافع قال لينا انتوا يا ناس الهلال – ناس المريخ ديل موش مرة اشتكوا الهلال في (عاكف) – قام ادوهم درع الانقاذ بعد المباراة مباشرة بعد ان حسموا الشكوى بين الشوطين في المقصورة.
• قلنا ليه بلحيل.
• نحن درع الانقاذ نعمل بيه شنو؟
• الشافع قال لينا انتوا ناس المريخ ديل موش مرة اشتكوا هلال كادوقلي في لاعب من (ابيي) وكسبوا نتيجة المباراة.
• قلنا ليه بلحيل.
• الشافع قال لينا انتوا ناس المريخ ديل موش مرة اشتكوا الامل في عطبرة – وقالوا في لاعب في الامل ضرب ليه حكم في القضارف بونية – وناس المريخ اللاعب الضرب الحكم بونية في شندي ، لعب المباراة التالية ، من واقعة هذا الاعتداء.
• قلنا للشافع بلحيل.
• الشافع قال لينا موش ناس المريخ ديل مرة طلعوا (الشرطة) من الملعب وقالوا ما بنلعب إلّا الشرطة تطلع؟
• قلنا للشافع بلحيل – كلامك اصلو ما غلط.
• الشافع قال لينا : موش ناس المريخ ديل بيلعبوا في استاد الهلال المباريات المحلية ومبارياتهم في البطولة الافريقية ، وبعد دا كلو لمن التش اتصاب قالوا ملعب الهلال فيه (حفرة).
• قلنا ليه كلامك صاح.
• الشافع قال لينا : موش ناس المريخ ديل قالوا الغربال عنده ثلاثة عقود …والرشيد ورمضان عجب مددوا ليهم العقد.
• الشافع قبل ما يتم كلامو دا – نزلناه في الواطة.
• الشافع قال لينا وقت ناس المريخ عملوا الحاجات دي كلها يعني غريبة عليهم يقدموا شكوى في (الدالي) لصالح مازيمبي ، عشان الدالي لعب الكورة (مبرومة).
• قلنا للشافع والله كلامك حقيقي – وناس المريخ ديل ممكن يعملوا أي حاجة.
• هسع مزمل يقول لوائح الفيفا بتحرم على اللاعب يبرم الكورة.
• عليكم الله دي كورة وإلّا سجارة؟
• نحن قاعدين كدا جاء فوقنا (الكرير ود سعد حلج الشامة) ، عيونه مكرفسة متل (المنديل).
• قلنا للكرير مالك ؟
• في شنو؟
• الكرير قال لينا والله انا مستغرب في الجماعة ديل.
• نجيب فخري يجيبوا فخري.
• نجيب صربي يجيبوا صربي.
• نسجل لاعب من جامايكا – يسجلوا لاعب من جامايكا.
• الناس ديل لو ما بخجلوا كان علقوا شعار الهلال في ناديهم.
• عليكم الله هسع ناس المريخ ديل (جامايكا) قبل الهلال في (الاطلس) قابلتهم.
• ديل كانوا فاكرنها (اسكافي).
• او فيلم اجنبي.
• هسع بقوا ينتظروا منها (البطاقة الدولية).
• والله الهلال عمل فيكم عملية عجيبة.
• دخل فيكم ثقافة عديل كدا.
• هسع عشان العالم كله بتكلم عن محترف الهلال الجامايكي ، ناس المريخ مشوا جابوا ليهم محترف من جامايكا.
• انتوا فاكرين الحكاية (خبيز).
• ان شاءالله بس يلعب ليكم.
• الكرير قال لينا انا الحاجة المتحير منها – ناس المريخ سجلوا ليهم لاعب طوله 193 سنتمتر.
• يعني مترين إلّا 7 سنتمترات.
• الزول دا لو اشتغل نقاشة ما بحتاج ليه (سقالة).
• ولو دخل ليه مكتب إلّا يقفلوا ليه المروحة.
• والله محترفكم الطويل دا لو جبتوه لمحمد عبدالرحمن الغربال بيلقي فيه سوقو.
• الزول دا بي الواطة بتمشي فيه زي الموية.
• زولكم دا لو عاوز يندقر ساكت عاوز ليه (شوط).
• دا في السودان ما بنفع.
• عشان الكشافات في ملاعبنا كلها طولها ما بتجاوز المتر ونص.
• ما معقول تجيبوا ليكم لاعب اطول من الكشافات.
• غايتو يا ناس الملاعب الزول دا لو جاء المريخ تاني مباريات المريخ إلّا تنقلوها في قناتين.
• الملاعب ون.
• والملاعب تو.
• قناة واحدة ما بتقدر تغطي ارضية الملعب والجو في نفس الوقت.
• المحترف دا الحكم لو عاوز يعطيه (كرت اصفر) إلا ينتظروا في الطابق الرابع.
• الكرير ود سعد حلج الشامة – قال لينا الكلام دا وهو بشرب ليه في كوز موية – قطع ليه (جردل) من العطش.
• الكرير كان زول صعب في الحلة ما بقبل الحقارة – ولمن يشوف ليه حاجة غلط بقيف فيها بي نفسو.
• مرة جابوا ليه خبر وفاة – مشى المقابر حفر القبر – وبعد انتهى من القبر قال ليهم : المات منو؟
• …………..
متاريس
• نحن عاوزين المريخ يسجل ليه اكبر عدد من المحترفين.
• عشان شكاوي الفيفا تكتر.
• والله المحترف (الطويل) دا الظاهر عليه جنو (شكاوي).
• دا ح يعمل ليكم (الفيفا) ساسق.
• المريخ شكلو بنزل للتانية.
• 5 محترفين.
• انتوا محترف واحد قاطع قلبكم.
• بختنا.
• مشت معانا صاح.
• ……….
• ترس اخير : سمعنا بالرغيف بالكيلو …لكن محترفين بالكيلو دي ما سمعنا بيها إلّا عند المريخاب.