واضح إنو المرحوم غلطان!!

قزاز ورذاذ

محمد الطيب الأمين

واضح إنو المرحوم غلطان!!

* أكثر ما يعجبني في (الفسيخ) ذلك الوضوح الذي يتعامل به مع الناس .
* الفسيخ واضح جداً لا بكضب عليك ولا بغشك .
* الفسيخ بيقول ليك : (ده أنا ودي رِيحتي داير تأكل أكل ما داير تأكل في ستين) .
* وأكثر ما يعجبني في الأخ سوداكال إنو زول (قاسي جداً) قال ليهم : (ده أنا ودي ادارتي ، تمشي الفيفا ولا تعمل مسيرة أنا قاعد) .
* نتمنى من الأخ التازي أن يدعم الحملة الإنتخابية الخاصة بسوداكال.
* وأنا ما بفسر وأنت ما تقصر .
* بخسارة وفوز وميدالية فضية واحتكاك على أعلى مستوى جنى الهلال ثمار مشاركته في بطولة (سوبر سيمبا) .
* بطولة سيمبا ادت الغرض وجهزت فيني وجيسي بشكل ممتاز .
* كما أنها قدمت أبوجا واعدت نخبة من اللاعبين الذين عانوا من الحبس خلال الفترة الماضية .
* الكويس في بطولة سيمبا إنها قطعت الشك باليقين .. (أبو عشرين الحارس الأول بالفريق وابوجا الحارس التاني والتالت) .
* وبالمناسبة .
* من عجائب الدنيا السبعة أن الذي يقلل من فوز الهلال على مازيمبي هو الآن يستعد للمجموعات بمباريات ودية مع الامتداد .
* المريخ ده يا ما عارف يعني شنو مجموعات ؟ ويا كمان ما عارف المجموعات يعني شنو ؟
* واحد من الإتنين ديل صاح.
* قدامك الأهلي المصري وأنت بتلعب مع الامتداد؟
* البيعمل فيهو المريخ ده اسمو (المرحوم غلطان) .
* وغايتو السنة دي بالذات يا متنا من الضحك ويا كمان الضحك كتلنا .
* كشف الهلال حالياً فيهو لاعبين من (٧) جنسيات وهي : (السنغال ، الكنغو ، زيمبابوي ، جامايكا ، السودان ، يوغندا ، والغربال .
* ااي الغربال .
* عندك مشكلة ؟
* ست جنسيات والغربال الجنسية السابعة .
* الغربال جنسيتو سوداني لكن كورتو ما سودانية .
* الهلال من (الوسط وأنت ماشي لقدام فيهو جيسي ونزار وفيني وروفا والجمايكي والسنغالي وسليم وبشة صغيرة والغربال وعيد مقدم) .
* ده طبعاً غير (موفق صديق ووليد الشعلة ومحمد موسى ومنير) .
* ويجيك واحد مريخابي ما عارف إنو (مانديلا) كانت (دورة رمضانية) ويقول ليك : عندنا نوح وجايبين النابي .
* النابي مدرب محترم نجح مع الهلال وهذا لا يعني أنه سينجح مع المريخ .
* انت نجيلة ما عندك النابي يعمل ليك شنو ؟
* النابي مسكين فاكر إنو المريخ زي الهلال وما عارف إنو (فرق السماء والأرض) .
* أول حاجة بننصح بيها الأخ النابي إنو يشتكي المريخ قبل توقيع العقد.
* والله صحي .
* اشتكيهم للضمان كده .
* الناس ديل ما في زول ما اشتكاهم.
* في ناس اشتكوا المريخ للفيفا وفي ناس اشتكوهو لرب الكون الفي العيون أبدع.
* أما الأخ قوميز فقد هرب رجاله كده .
* قوميز اتشلب.
* عشان تدرب المريخ لازم شكوتك تكون جاهزة .
* تكسب زمنك .
* درب فيهم وخلي المحامي يحرك ليك الاجراءات.
* عشان لما يحصل معاك قدر الله يا النابي تلقى شكوتك محسومة.
* الكلام ده بنقول ليك من باب الخوة الجمعتنا في الهلال .
* هسه المدرب الصربي اشتكى المريخ .
* قبل ١٥ يوم المريخ فاوض ليهو مدرب صربي ورسل ليهو العقد .
* وعمك الصربي طلع (لايف) وقعد يتكلم عن سوداكال ويشكرو.
* بعد يومين المريخ غير رأيو.
* وده طبعاً حال (المشلوبين) .
* أي زول مشلوب (بيكون متخبط) .
* قوم على حيلك.
* الصربي اشتكى المريخ تحت مادة (الإزعاج العام) .
* المهم .
* بحمد لله شهد يوم الخميس الماضي الحلقة الأولى من برنامج (دقايق) على قناتي باليوتيوب .
* وسيكون البرنامج كل خميس إن شاء الله ، أتمنى التوفيق ودعم الأخوة الاهلة ، ورابط القناة بصفحتي على الفيسبوك .
* ونركب صافنات ونجيبة (كسلاوية) واصلو الزول بيموت والذكرى تفضل حية .
* و..و..
* والله في .