الهلال يلعب امام (مازيمبي) والمريخ امام (الامتداد)!!

صابنها

محمد عبد الماجد

الهلال يلعب امام (مازيمبي) والمريخ امام (الامتداد)!!

• الليلة يوم 29 يناير – والتسجيلات في العالم كله – ناهيك عن السودان باقى ليها (48) ساعة.
• ما اكتر من كدا.
• وناس المريخ لغاية الآن ساكين الطرف اليمين لمنتخب جامايكا الفاس باول …مركزين في الزول دا اكتر من تسجيلاتهم.
• اقعدوا باروا لي مزمل لمن القطر يفوتكم.
• فرحانين بي بخيت خميس.
• وكرنقو.
• وطبنجة.
• والنابي.
• جماعتكم مركزين مع (الفاس) الوقع في الرأس!!
• البقول ليك عندو رباط صليبي.
• والبقول من شهر اغسطس الزول دا ما لعب مع فريقه.
• والبقول ليك الزول دا عندو ضرس ما بخليه يلعب.
• والبقول ليك حبوبتي كلامها كتير.
• والبقول ليك عندهم (حيطة) وقعت في الخريف الفات.
• والبقول ليك في بكاء ابوي ما جاني.
• والبقول ليك عندهم كلب (شرس).
• الزول دا ما فاضل ليهم إلّا ان يطلعوه (كوز).
• أي حاجة بتخطر في بالهم قالوه فيه.
• غايتو يا مزمل ابوالقاسم الناس ديل علمتهم جنس شناة طبع.
• بقى الهلال من ان يسجل ليه (لاعب) محلي او اجنبي يخلوا أي شيء عشان بس يطلعوه ما عندو حاجة وصفقة خاسرة.
• الناس ديل ياسر مزمل ما ريحوه.
• لا خلوا ياسر مزمل.
• لا بوجبا.
• لا الطيب عبدالرازق.
• أي واحد في الجماعة ديل قشطوه ليك بـ (رباط صليبي).
• علما ان فريق المريخ نصه مضروب بالرباط الصليبي.
• اعلام المريخ نحن اتعودنا منهم ذلك.
• بل اصبحنا لا نثق في لاعب يسجله الهلال إلّا اذا خرج اعلام المريخ ليؤكد ان الصفقة خاسرة وان اللاعب مصاب.
• الناس ديل ما عندهم موضوع.
• ولا عبارات جديدة.
• ولا عندهم منطق اخر.
• نفس الكلام القالوه في كلتشي قالوه في سادومبا – قالوه في جمال سالم – قالوه في جيسي – قالوه الآن في الفاس باول.
• ما عندهم أي جديد.
• يا جماعة عشان نصدقكم – غيروا (الكضبة) شوية.
• جيبوا لينا (كضب) جديد.
• ما معقول من سنة 90 وانتوا بتكضبوا في نفس الكضبة.
• الكلام دا في حقكم ما كويس.
• ناس المريخ على قناعة انهم في المريخ ما عندهم قدرة على انهم يعملوا حاجة جديدة.
• ناس المريخ صرفوا جهدهم كله في التقليل من شأن الهلال وفي العمل على افشال كل ما يقوم به الهلال.
• الناس ديل لو انصرفوا لخدمة ناديهم كان عملوا حاجة.
• هسع لو سألنكم عملتوا شنو في التسجيلات الاخيرة ، ح تقولوا الفاس باول عنده رباط صليبي.
• ح تقولوا ما كان بيلعب في المباريات الاخيرة.
• الزول دا كان بيلعب مع نجم ريال مدريد في فريق واحد.
• يا ربي كان بيلعبوا (كوتشينة).
• الزول دا عندو صورة مع بيكهام.
• يا ربي الصورة دي كانت في (عرس).
• اتخيلوا انتوا بس ناس عندهم طبنجة وكرنقو وبتكلموا عن الفاس باول.
• انتوا الجماعة ديل ما عندهم رأس.
• الزول دا لو جانا شايلونو بي عكاز.
• وما بشوف.
• وما بسمع سمح.
• وعندو مشاكل في القلب.
• ورباط صليبي في الكرعين الجوز.
• و9 اولاد في الجامعات اصغرهم في خامسة طب.
• الزول دا بالوضع دا احسن لينا من جماعتكم ديل.
• مرة عصام الحضري قال انا بعمل حسابي من باكات المريخ اكتر من هجوم الفريق الخصم.
• عصام الحضري وقت كان بيلعب في المريخ كان كل مباراة بطلع وفي مرماه هدف عكسي.
• يا ناس المريخ.
• اقول ليكم النصيحة.
• التسجيلات باقى ليها 48 ساعة فقط.
• وانتوا طالبتوا الاتحاد يرفع ليكم الكشف الى 32 لاعبا.
• وطالبتوا الاتحاد يسمح ليكم بتسجيل 5 محترفين.
• وين محترفينكم؟
• الهلال يغشكم.
• ويلعب بيكم كورة.
• يضقل بيكم.
• وفي النهاية محترف ما تسجلوه.
• كل مرة نسمع بتفاوض المريخ مع محترف جديد.
• سوداكال ينزل بيكم فاضي.
• ويطلع بيكم فاضي.
• وما في أي حاجة.
• مرة كاسنجو.
• ومرة نجم منتخب غينيا.
• ومرة محترف كان بيلعب في اسرائيل.
• ومرة منو كدا ما عارف.
• وما في أي حاجة.
• التسجيلات باقى ليها 48 ساعة.
• الهلال سجل من اوروبا.
• وسجل من امريكا.
• والشكر والتقدير للمستشار تركي آل الشيخ.
• وناس المريخ قاعدين للتبخيس.
• تتخيلوا في الدنيا دي – اول مرة نادي سوداني يسجل ليه لاعب من نادي اوروبي مباشرة.
• اول مرة تحصل.
• واول مرة نسجل لينا لاعب بيلعب في الولايات المتحدة الامريكية.
• والله دي لو قلتوها لي حمدوك ما يصدقها.
• الهلال عملها.
• بنسجل من اوروبا ومن امريكا – وناس المريخ ما عاجبهم ذلك.
• بونسوا في جمهورهم.
• بونسوا في ناس القروبات.
• نادي لا سجل من الدرجة الثانية.
• ولا سجل من الليق.
• وبتكلم عن نادي سجل من اوروبا ومن امريكا.
• دي قابلتكم في حتة.
• ديل بضحكوا من منو؟
• خلوا هذا العبث الذي يفعلونه الآن.
• اتركوا كل شيء.
• تعالوا شوفوا الكارثة التانية.
• ناس المريخ لغاية الآن تسجيل الغربال في الهلال ما وقع ليهم.
• الكلام دا ما قدروا يستوعبوه.
• لغاية الآن ما مصدقين الحتة دي.
• تتخيلوا ناس المريخ قالوا الغربال وقع في هذا الموسم ثلاث عقود.
• بضحكوا على الناس.
• الناس ديل مالهم؟
• راعي الضان في الخلا ، عارف ان تعاقد الهلال مع محمد عبدالرحمن (الغربال) كان في هذا الموسم.
• الغربال لم يوقع في الموسم الجديد غير عقد واحد وهو مع الهلال.
• العالم كله بدأ موسم جديد ، وهو الموسم الذي وقع فيه الغربال للهلال.
• الكلام دا خلوه.
• تعالوا نعتبر الغربال وقع مع الهلال عقدا في الموسم الماضي.
• نمشي معاهم حسب عقلهم.
• الغربال انتقل من المريخ الى فريق شباب أهلي برج بوعريريج الجزائري .
• الكلام دا مظبوط.
• من شباب أهلي برج بوعريريج الجزائري وقع الغربال عقدا مع فريق جزائري اخر.
• لكن لاسباب خارجة عن ارادة الغربال لم يتم اعتماد هذا العقد….الفيفا لم تعتمد هذا العقد.
• عليه لا يمكن اعتبار هذا العقد – لأنه في الاساس عقد باطل – لم تعتمده الفيفا نفسها.
• على ضوء ذلك مفروض الغربال يرجع لفريقه الاساسي وهو فريق شباب أهلي برج بوعريريج الجزائري.
• لكن لأن شباب أهلي برج بوعريريج الجزائري لم يلتزم بالبنود التى عليه – قام الغربال وعن طريق محاميه بفسخ تعاقده مع الفريق الجزائري.
• الفسخ العقد منو؟
• الفيفا.
• العقد لم يفسخ بواسطة لجان المقاومة.
• يعني عقود الغربال كلها غير (قانونية) وغير (معتمدة) ولم يحدث فيها (بيع) او يتم (تفاوض) من اجل الانفكاك منها.
• كل هذه العقود بطلت وفسخت من خلال الفيفا.
• يبقى يا فالحين العقود دي تبقى (3) عقود كيف؟
• عندكم مشكلة في الطب.
• وفي القانون.
• وفي الحساب كمان.
• والله يا مزمل انا ما عارف (المخدر) البتعملوا للجماعة ديل جنسوا شنو؟
• يغشغش فيكم من تسجيلات لي تسجيلات.
• والجماعة يشيلوا ويصدقوا.
متاريس
• الهلال يلعب اليوم مباراة قوية مع مازيمبي.
• وان شاءالله الهلال يظهر بالمستوى المطلوب.
• ويحقق النتيجة المنتظرة.
• لكن في كل الاحوال ما عندنا مشكلة.
• هذه التجارب الودية تبقى مفيدة جدا للهلال.
• الهلال سوف يجني منها الكثير.
• الهلال يلعب امام سيمبا ومازيمبي والمريخ يلعب مع الامتداد.
• مبروك المريخ انتصر على الامتداد 4 صفر.
• فالحين شديد.
• مع كامل احترامنا وتقديرنا لفريق الامتداد – لكن اللعب امام الامتداد ليس مثل اللعب امام مازيمبي.
• اعداد المريخ هذا سوف يجعله حصالة مجموعته.
• والهلال سوف يجني الكثير من تجاربه الاعدادية في تنزانيا.
• نتمنى ان تنجح القنوات السودانية اليوم في نقل المباراة.
• نتوقع ان يظهر الهلال ان شاءالله بشكل غير.
• انتظروا جيسي – عنده الكثير.
• ………..
• ترس اخير : تاني استاد الهلال تشوفوه بس في بين سبورت.