تربسة سيمبا

نبض الصفوة

امير عوض

تربسة سيمبا

الواحد كلما يقول ياخد استراحة محارب و يتوقف عن الكتابة وسط هموم الحياة.. تأبي نفس كجول إلا أن تفتح نفسه للكتابة..

وسط الأزمات.. و رهق الصفوف و ضغوط الحياة.. تبقي هزائم الهلال ـ المتكررة ـ مصدر سعادتنا دوماً..

البلد وضعها أصبح في الحضيض.. و ترباس قال (الرووووب) و تربس معاه الهلالاب..

الزول ده مشكلته شنو مع الجماعة ديل؟

يعطش.. يتلطشوا خمسة!!

يجوع يتلطخوا أربعة!!

الهلال ده (كالون) ترباس عديل..

جابوا ليهم كفيل و الأربعات لسه مدورة..

مجرد ظهور اسم مازمبي في الدورة الودية فالجماعة جاتهم أم هاللا هاللا..

قال ليك في واحد خواف خوف جد..

ساكن في حلة جنب الغابة..

الغابة دي فيها مازمبي.. قصدي فيها أسد كبير..

في يوم بقرة ماتت في الحلة..

سيد البقرة جدعها طرف البيوت..

و البقرة ريحتها طلعت..

الحلة بقت ما بتنوم بالريحة..

ناس الحلة قرروا يجدعوا البقرة في الغابة و يعملوا دورة ودية..

الهلال.. قصدي الخواف قال ليهم اربطوني بحبل من نصي مع البقرة عشان ما أجري لو الأسد جاء..

الجماعة ربطوهو.. و جروا البقرة لما وصلوا نص الغابة..

الدنيا وش مغارب..

شويتين سمعوا ليك صوت الأسد..

و كل زول قام جاري علي جهة..

ناس الحلة واقفين قدام البيوت يحسبوا في الناس الراجعين..

عدوهم كلهم إلا الخواف..

الجماعة قالوا خلاص الأسد انتهي منه..

قالوا نمشي نكلم أهله و نجهز للبكاء..

لما وصلوا البيت و دقوا الباب جاهم زولنا الخواف ذااااتو..

فلان انت جيت متين؟

جيت جاري.. شيلوا حبلكم ده مني..

سألوهو.. اتفكيت من البقرة كيف؟

قال ليهم.. البفكني شنو.. أهي دي بقرتكم في نص الحوش بتاعي.

بسم الله الرحمن الرحيم..

لكن ديل مالهم..

الخلعة الخشت فيهم دي من شنو؟

بروفات المجموعات بدت و الانبراشة و الفضائح بدوا..

طيش أفريقيا حيتوسد مقعده من بدري السنة دي..

السترة و الفضيحة متباريات يا هلالاب!

كل سنة تتشبروا في الأبطال و تاخدوا الفيها النصيب..

بالسوباط أو بالكفيل فكجول في فتيل..

رجفتكم دي خربت طبع أولادنا..

جمال (ملوص الأول) بقي أكعب من ملوص التاني!!

الاولاد ديل كانوا نجوم قبل شهور..

هسه الواحد فيهم تشوتها فيهو من الزاكياب يملصها في الشبكة..

نمرة 3 أمس جاب قوون و رقص رقصة الطين..

الزول ده منو الكلمو عن قصة كجول في الطين..

أكيد ده قوميز اب حنكاً خفيف..

يجازي محنك يا الماسورة..

ما لقيت إلا تحكي ليهم قصة الطين دي؟

تستاهل سوداكال ما يديك مرتباتك..

فضحتنا مع الاخوة التنزانيين..

تنزانيا دي بتحترم المريخ و السودان..

بالاخص سيمبا..

ديل بخافوا مننا لما سرقوا مدربنا ـ الماسورة ـ

متخيلين كده ممكن يتأهلوا عبرنا..

قالوا نعمل دورة نجيب فريق سوداني يعرفنا عن الزعيم..

انا ما عارف هم عملوا دورة واللا دروة؟

ديل ختوا الهلال في فتيل و طاخ طاخ وقعوا فيه كفيت..

غايتو لو راجين تتعرفوا علينا عبر الهلال تبقي واطاتكم أصبحت..

الهلال ده في أفريقيا زي الزول الكضاب..

ده كمان قال ليك مشي يخطب بت ناس..

الجماعة قعدوا يتعرفوا عليه..

أمكانياتك شنو يا الاخو؟

قال ليهم.. انا عندي 3 شركات و سبعة عمارات و مزرعتين!!

قام عم العروس عفص أخوهو و براحه مسكل للماذون..

الحبوبة لا شعورياً زغردت لما طقم الاسنان جاء واقع..

أخو العروس قال ليه.. نحن أسرة محافظة.. قصص خطوبات و حوامة دي ما عندنا.. نعقد بس و هسع دي..

زولنا قاليهم أبشروا..

الجماعة راجين الماذون.. قالوا يتعرفوا بالوجيه ده زيادة..

انت زول غنيان ما شاء الله.. أهلك ديل كيف ما أدوك بناتهم..

قال ليهم.. في الحقيقة انا مرتاح و مرطب.. لكن ما عارف ليه أهلي مسمني (علي الكضاب)!.

الهلال ده تلاتة سنة وصيفنا الابدي بالرغم من انه نحن قاعدين بدون مجلس..

الزول المركب مكنة رئيسنا الحالي قضي حبسه في السجن و طلع و الهلال لسه في وصافتو و قيافتو..

بالكاردينال أو بتركي.. الوصافة ثابت مغطينا..

الدليل انه وصيفنا هو طيش أفريقيا تلاتة سنة..

متربس و الحمدلله..

شبعان و رويان تلطيش و فضايح..

بطولات الهلال كملها الطاهر يونس في الصور..

الباقي الحي الله و القاتل الله..

السوباط ده عارف انو قروشه الدفعها ديك كلها راحت شمار في مرقة واللا ما عارف؟

لو ما عارف خلوهو يسأل كردنة..

زمان قال ليكم الهلال ده لو ما بقي بطل أفريقيا في 2017 تاني ما يحلم بيها..

كردنة زول نصيحة..

زول دغري و بختها واضحة..

من زمن النادي كله كريستالات لحدي زمن لو رفسك حمار هل انت حترفسه!!

السوباط خلوهو.. تركي ده عارف حاجة عن الصفر القرني المقيم؟

زول كان رئيس الأهلي نادي القرن الأفريقي.. يجي يبقي رئيس نادي الصفر الأفريقي؟

تركي ده عجبو الاسم بس..

يكون قايله زي هلال الرياض..

خسارة الحوافز و النفخ..

قلتو لي عايزين تعسكروا في تنزانيا..

أها..

الفضيحة دي في زمن النت ده نداريها كيف؟

الأربعة دي ندفنها وين في البرد ده؟

نختها في تلاجة؟

الكهرباء قاطعة!

نجدعها في الخور؟

زول يشيل معانا ماف..

الناس كلها في الصفوف..

السنة دي متوقعين صفوف الأهداف في مرمي الملوصاب..

الحمدلله ابو عشرين كسر نخرته..

الله شافك يا لون الدم..

الملص الدولي ده انت لسه صغير عليه..

يادوبك انت ملصت ملصة ملصتين محليات..

الدولي ده خليهو لي جيمي..

اتعود علي الفضايح و اللطخ..

من فارق نمر و امير تاني ما شم العافية..

كل سنة نصدّر ماسورة لوصيفنا..

و آخرتها تبقي ملصة..

و رقصة..

و صفر ثابت..

الله غالب.

نجي للمهم..

صحّ النوم يا زعماء..

سيمبا ده هو الخطر الحقيقي..

فريق منظم..

ادارته واعية و مقتدرة..

بحترمونا جداً.. و محترمين حجمنا الحقيقي و ساعين لخطف بطاقة التأهل مننا..

لو قضيناها كلها ضحك في رباعيات الخيام دي يبقي مع السلامة للأبطال..

عمايل سيمبا دي في صالحنا..

كويس انه نبهنا بأن الخطورة ليست في الأهلي و فيتا فقط..

سيمبا ده الأهم..

لازم يتضرب رايح جاي..

يتعاقب علي خطف قوميز الماسورة..

و يتعاقب لأنه لطش وصيفنا الدهري..

الرسالة لعناية لاعبي المريخ..

و لجهازهم الفني القادم..

و بإذن الله حتي موعد مباراتنا معاهم يكون قرار عودة الجمهور للملاعب قد اكتمل..

زلزال الملاعب عنده هدية لسيمبا المتطاول..

و حتي ذلك الحين.. أعدوا لهم ما استطعتم من قوة..

و بالتوفيق لمريخنا العظيم.

*نبضة أخيرة*

إتربسي.