لازم يهرب .. لا لقى عندكم نجيلة في الإستاد ولا رغيف في المعسكر !!

قزاز وزذاذ

محمد الطيب الأمين

لازم يهرب .. لا لقى عندكم نجيلة في الإستاد ولا رغيف في المعسكر !!

* سألت الأخ الحبيب طه سليمان ذات مرة عن أغرب مواقف حفلات الأعراس.
* فقال أنه سبق وأن غنى أغنية (جناي البريدو) سبع مرات في حفلة واحدة وذلك بطلب من المعازيم.
* وطه سليمان رغم إختلاف الناس حول مشروعه الغنائي إلا أن هنالك إجماع على صوته.
* صوت مليان عافية وتطريب.
* ولطه أغنيات بالغة التأثير في بيوت الأعراس.
* وله ايضا أغنيات حزينة لم تجد حظها من التداول وعلى رأسها أغنية (صاحبي الوحيد) التي كتبها محمد ديكور واهملها طه ليغنيها فيما بعد حسين الصادق.
* يقول مطلع الأغنية : (ما لقيتي غير صاحبي الوحيد كان تمشي إنت مع السراب وتبقى الخيانة بعيد بعيد).
* دي زولة (رخيصة) خانت محمد ديكور مع (صاحبو الوحيد).
* والظريف في الموضوع إنو ديكور ما أعترض على الخيانة ولكنه أعترض على (صاحبو الوحيد).
* وبما أن ذلك كذلك فإن المريخ الآن ما معترض على هروب قوميز وإنما معترض على (سيمبا المعاهو في مجموعة واحدة).
* والله صحي.
* هم عارفين إنو ما في مدرب بيقعد ليهو مع فريق لا عندو استاد ولا عندو نجيلة ولا عندو رئيس.
* ما عندهم مشكلة في هروب قوميز لكن مشكلتهم إنو مشي سيمبا.
* لو قوميز هرب مشى مولودية الجزائر ما عندهم مشكلة بس ما يمشي سيمبا.
* كانوا دايرين (الخيانة) تكون بعيد بعيد أو كما كتب الحبيب محمد ديكور.
* طيب ما يمشي سيمبا ليه؟
* يقول ليك : كده بكشف ورقنا لفريق سيمبا.
* هو أنت عندك ورق؟
* ورق شنو البكشفو يا ود الناس؟
* يا هم ناس نوح وتمبش ديل ولا حاجة تانية.
* قوم على حيلك.
* قال بكشف ورقنا قال؟
* انت قايل نفسك عندك جيسي ولا عندك محمد عبد الرحمن؟
* كرنقو وأمير كمال ديل كمان دايرين ليهم زول يكشفهم .
* سيمبا ما منتظر قوميز عشان يكشف ليهم المريخ .
* ومع ذلك قوميز لن يقصر .
* ما بقصر لكن ما في النواحي الفنية لانو فنياً المريخ معلم الله .
* ح يكشف ليهم النواحي الإدارية.
* ح يقول ليهم إنو المريخ يومياً بتمرن في ملعب بسبب عدم وجود نجيلة في إستاده الذي هو (إستاد الحكومة) .
* ح يقول ليهم الفريق ماشي بالحماس ويوم غاب الحماس كان التعادل أمام توتي .
* ح يحكي ليهم عن (الرغيف) البيقصر في معسكر الفريق .
* دي الجوانب الممكن يكشفها قوميز .
* غير كده ما في حاجة بكشفوها.
* أنتو ذاتكم بتبالغوا والله .
* زول جاي من فرنسا لا يلقى عندكم نجيلة في الإستاد ولا يلقى رغيف في المعسكر .
* يقعد ليكم كيف بحالتكم دي .
* الراجل ده (٣٥) يوم بس صحتو نزلت .
* نزل (١٣) كيلو في (٣٥) يوم .
* سمية الخشاب عشان تنزل (٧) كيلو انتظرت (٦) شهور و(١٢) يوم .
* ده في شهر واحد نزل (١٣) كيلو.
* بقى زي (أسود حديقة القرشي) .
* وتعال أناقشك.
* طبعا هروب الاجانب من المريخ ما جديد .
* الحضري كان بهرب في اليوم مرتين .
* خليك من الحضري أنا بحكي ليك قصة قد ما تصدقها .
* زمن جمال الوالي المريخ جاب لاعب اسمو (مبينزا) .
* مبينزا ده كان بلعب في مازيمبي.
* جمال الوالي جابو بقروش المؤتمر الوطني.
* اللاعب وصل المطار وقابل جمال الوالي على مائدة عشاء بالنادي الألماني.
* واتفقوا على كل التفاصيل واللاعب قبض .
* وتاني يوم جا مكاتب الإتحاد العام ووقع إبداء رغبة والجماهير حملتو على الأعناق.
* لحدي الآن الجريدة عندي وفيها صورة مبينزا محمول على أعناق عدد من جماهير المريخ .
* هل تصدق يا عزيزي مبينزا بعد الكلام ده كلو مشى وما جا .
* ما دقاها ولا يوم .
* مشى بي وشو .
* وأنا والله أكتر حاجة أثرتني في الموضوع ده منظر الجماهير وهي تحمله على الأعناق.
* أنتو بتحملوا ساي ؟
* غايتو جنس غايتو .
* المهم .
* الحمد لله (دشنت قناتي على اليوتيوب وقد أخترت لها إسم دقايق) والرابط منشور بصفحتي الشخصية على الفيسبوك .
* سأقدم من خلال قناة (دقايق) برنامج اسبوعي كل خميس .
* اتمني التوفيق من عند الله ومؤكد أنني أنتظر دعم الجمهور الهلالي العظيم .
* دقايق .. وراء كل دقيقة حقيقة .
* وغايتو السنة دي بالذات يا متنا من الضحك ويا كمان الضحك كتلنا .
* ونركب صافنات ونجيبة (تنزانية) واصلو الزول بيموت والذكرى تفضل حية.
* و..و..
* وابقى رضيان بيها قسمة والجاية من الله بتصيب .