الخبر دا بكتل ليه (زول)

صابنها

محمد عبد الماجد

الخبر دا بكتل ليه (زول)

• امس وقع في عيني هذا الخبر (متل البرّاد الصيني) – قرأت الخبر اكتر من مرة – قلت يا ربي الجماعة ديل (بنكرياساتهم) بكون حصل عليها شنو؟

• جهجتوا (البنكرياس) ذاتو.

• الكلام دا لو حصل اقنعوا من (لغالغيكم).

• واقنعوا من (بنكرياساتكم).

• عندنا زول في الحتة دي بفك ليك البنكرياس نبكر بنكر.

• والعندو (مصران) سكند هاند احسن من هسع يغيرو.

• الكلام دا – والله ما بتقدروا عليه.

• العندو ضرس كعب يشيلو.

• اسمعوها مني (الحشوة) ما بتعمل حاجة.

• والبعمل فيه المريخ دا شغل (حشوة).

• احسن اقلعوه ساي.

• لا حشوة بتنفع.

• ولا قتل جذور.

• التازي ما بحلكم.

• شوفوا ليكم (رئيس فخري) هندي.

• او روسي.

• او من افغانستان.

• احسن ليكم.

• التازي ما بقدر على الكلام.

• التازي دا ابعد حاجة عندو يعيد قيد سيف تيري.

• ما اكتر من كدا.

• وممكن يجيب ليكم عربة اصابات الملاعب.

• بالكتير كدا طيارة خاصة.

• سيف تيري من الركشة للطيارة الخاصة.

• الكلام دا ذاتو ما بجي.

• تقلعوا في عيونكم متل (البصل).

• اول مرة اعرف ان قليع العيون زي (البصل).

• امس قرأت هذا الخبر الذي نقلته صحيفة (ريمونتادا) من صحيفة (الرؤية الاماراتية.

• المريخاب وقت قالوا ليهم الخبر جابتو (الرؤية) – قالوا دي (رؤية) شنو؟ دي رؤية منامية وإلّا رؤية تانية.

• دي ما رؤية نصاح.

• والله الكلام دا في الاحلام ما بيحصل.

• (كشفت صحيفة الرؤية الاماراتية، تحركات معالي تركي ال الشيخ، المستشار بالديوان الملكي السعودي والرئيس الشرفي للهلال، لتدعيم صفوف الازرق مع فتح نافذة الانتقالات في السودان، وتحت العنوان: “صفقات مليونية على رادار الهلال السوداني بعد تولي تركي آل الشيخ الرئاسة الفخرية”؛ وأوردت الصحيفة: “رفع إعلان المستشار في الديوان الملكي السعودي تركي آل الشيخ قبوله الرئاسة الشرفية لنادي الهلال السوداني أخيراً، سقف الطموحات عالياً بين جماهير الفريق السوداني، والتي بدأت تمني النفس بنقلة نوعية تضاهي رصيد وزير الرياضة السعودي السابق في عالم إدارة كرة القدم، وهو الذي يمتلك حالياً نادي ألميريا الإسباني العريق.. وبالفعل، سرعان ما حرك آل الشيخ الأجواء في الفريق السوداني الملقب بـ”سيد البلد”، إذ تموج الأجواء الآن بالأحاديث عن صفقات كبيرة في طريقها للفريق الأزرق، ستكون هدية من الرئيس الفخري الجديد.. وحددت الصحيفة الاسماء المرشحة في البرازيلي كينو- أتلتيكو مينيرو والاوروغوياني وسيرينو – صن داونز الجنوب أفريقي والتونسي فرجاني ساسي- الزمالك المصري وفيليبي غيدوز- البرازيلي ويلعب حالياً لنادي ناشيونال في الأوروغواي… وشيخ كومارا- ساحل العاج مدافع الوداد المغربي).

• العندو وجع ضهر – احسن يبعد من الكلام دا.

• العندو مصران يبعد لينا.

• البيشكي من (بنكرياسو) احسن يشوف ليه بلد.

• العندو صالون ما شايل حيلو ..احسن يقوم منو.

• العندو قريبو زول (عصبي) – يبعد لينا.

• الما قرأ (هندسة) الكلام دا ما بقع ليكم.

• معليش يا شباب.

• اطلعوا لينا من هنا.

• اتخارجوا.

• شتتوا ساي.

• الكلام دا صعب عليك.

• ما عاوز اصدمكم.

• ما عاوز اقول ليكم كلام حار.

• اتخارجوا بس.

• الاسماء المرشحة للانتقال للهلال هي البرازيلي كينو- أتلتيكو مينيرو والاوروغوياني وسيرينو – صن داونز الجنوب أفريقي والتونسي فرجاني ساسي- الزمالك المصري وفيليبي غيدوز- البرازيلي ويلعب حالياً لنادي ناشيونال في الأوروغواي… وشيخ كومارا- ساحل العاج مدافع الوداد المغربي.

• وناس المريخ فرحانين عشان التازي ح يعيد ليهم قيد سيف تيري.

• عليكم الله الاسماء دي موش بتعمل وجع بطن.

• مغص شديد.

• وتخليك تشوف (المروحة) في السقف متل (الساقية).

• تفتح عينك متل (حلة الملاح).

• وتمرق زي الطالع ليك من قسم.

• ناس (التنين ود حسن) عندهم بقرة لو عاوز تحلبها تعمل نجمة تسعتين مربع.

• وتعمل ارسال.

• وناس (جقلول ود الطيب) عندهم (ديك) لو عاوزو يعوعي ترسل رسالة فاضية.

• يعوعي ليك متل (جدول اربعة).

• وناس (الامين ود العدم) عندهم (غنماية) اكلت ليها (مناديل ورق) حلبت ليهم اللبن في (ظروف).

• هسع الكلام دا في ليه داعي.

• ركزوا في (البنكرياس).

• غي خطورة عليه.

• البرازيلي كينو- أتلتيكو مينيرو والاوروغوياني وسيرينو – صن داونز الجنوب أفريقي والتونسي فرجاني ساسي- الزمالك المصري وفيليبي غيدوز- البرازيلي ويلعب حالياً لنادي ناشيونال في الأوروغواي… وشيخ كومارا- ساحل العاج مدافع الوداد المغربي.

• الكلام دا بشيل (الطوحال).

• وبجهجه (البنكرياس).

• ويخلي (الركب) تتخابط.

• تتدخل غلط.

• تمرق زلط.

• الكلام العجيب قالوا ليك في اسماء اكثر (دهشة) من هذه الاسماء الهلال عاوز يتعاقد معاها.

• في حاجات تانية.

• اقفلوا المراوح.

• عشان الكلام دا ما يطلع برة.

• الكلام دا صعب.

• البرازيلي كينو- أتلتيكو مينيرو…دا شاي الصباح بجيبو ليك في (عنقريبك) اذا قعدت تشاهد ليه مباراة.

• الهلال تاني ما تجيبوا لينا في الملاعب.

• قناة الملاعب مجلية ..جابت الهلال مهزوم قبل المباراة ما تبدأ.

• دي الفاضل ابوشنب ما عملها.

• الهلال تاني جيبوا لينا في قنوات بي ان سبورت.

• معقولة الكورة لسه ما بدأت والهلال مغلوب 0 / صفر.

• غايتو الزول وقت يكون ما بريدك.

• بعمل جنس دا.

• الهلال قالوا جايب محترفين من الوزن الثقيل.

• اتقل من هذه الاسماء التى ذكرت اعلاه.

• اسماء عجيبة.

• عليكم الله يا ناس الاتحاد – المرة دي لو فتحتوا لينا السيستم – افتحوا لينا الباب الكبير.

• الهلال المرة دي عندو اسماء كبيرة.

• افتحوا لينا الباب البدخل العربية.

• في حاجات كبيرة.

• وكان قلناها ليكم هنا – تاني ما في مريخابي بقعد لينا في البلد.

• معقولة بس.

• يكتفوا بي سيف تيري.

• ووجدى هندسة.

• امسكوا في وجدى هندسة قوي.

• ما عندكم خيارات.

• ما في احتمالات تاني.

• والاخبار التى تنشر عن محترفين الهلال – بتكتل ليها زول.

• اشربوا اللبن.

• وقفلوا تلفوناتكم.

• ونوموا بدري.

• يقوم يجيكم خبر طاير…يوقف قلوبكم.

• ما في احسن واضمن من اغلاق الموبايلات هذه الايام.

• وما في زول يطلع برة.

• ما في زول يقيف في الباب.

• وما في زول يقيف حتى في الحوش.

• احسن تتلموا من بدري.

• الكلام دا صعب عليكم.

• في صواعق ماشي عليكم.

• في كلام خطير.

• انتوا الشهر دا فيه كم يوم؟

• فيه 30 ام و31 يوم.

• فيه 31 يوم.

• عندكم فرصة يوم زيادة.

• ما مشكلة.

• بنصبر 24 ساعة.

• لكن تاني ما تسألوني.

• رابطوا في المكتبات.

• ابقوا في المواقع.

• احرسوا المطارات.

• صاقروا السماء دا.

• في حاجات ماشي عليكم.

• ابقوا في الانتظار.

• ابقوا حارسين.

• …………..

متاريس

• يا جماعة وين الامل؟

• الغريبة الامل وهلال الابيض شاركوا في الكونفدرالية وجاءت مشاركتهما خصما عليهم.

• الحاصل شنو؟

• معقول فحص الكورونا بعمل كدا.

• الجماعة ديل من فحصوا كورونا تاني ما شفنا ليهم شيء.

• ناس المريخ فكوا تضامنهم من الاشانتي في موضوع الكورونا.

• رفعوا البكاء.

• وإلّا لسه مرابطين مع الاشانتي؟

• مباراة الهلال مع صن دوانز باقى ليها 25 يوم.

• ومباراة المريخ مع الاهلي المصري باقى ليها ايضا 25 يوم.

• ونحن ما عندنا مشكلة.

• عاوزين تلعبوا مع الاهلي المصري بمنجد النيل وطبنجة ووجدي هندسة.

• الهندسة عندكم لكن.

• ………..

• ترس اخير : احسن ليكم تاني ما تابعوا (الاخبار) – ابعدوا من الحتة دي.