الاهلي المصري مجموعته ساهلة وواضحة زي (البيت الناصية)

• زمان الزول كان بوصفوه بالعجلة…الوقت داك كان اكتر حاجة في الدنيا (بوكسي) ما فيه مرايات.

• ما في اكتر من كدا في وسائل النقل.

• اتذكر كان وقت يوصفوا ليك زول ويقولوا ليه عليه (زول دائما بتلقاه راكب ليه عجلة) – وقت يقولوا ليك كدا بكونوا كتلوه.

• واضح وظاهر … واي زول بعرفه.

• وفي ناس بتاعين حركات – يخلو أي حاجة ويقولوا ليك (زول عندو صلعة).

• خلاص انتهوا منو.

• الوصف كل ما يكون واضح وظاهر بريحك في (البنكرياس).

• والبنكرياس كان تبقوا عارفين ما عندو علاقة بالوصف.

• انتوا ما تصدقوا أي حاجة.

• وما تقيفوا في أي شيء.

• لو في زول عاوز يوصف ليك صاح يوصف ليك بي (صهريج)…يقول ليك محطة فيها صهريج كبير.

• وانا من الله خلقني ما لاقاني صهريج غير انه (كبير).

• لكن عشان الزول يوريك انو مخلص في الوصف بقوم يقول ليك صهريج (كبير).

• في زمن كدا كان أي زول يوصف ليك (بيتهم) بقول ليك بيت فيه (نخلة) طويلة.

• واي نخلة (طويلة).

• شيء من الفلسفة كدا – الواحد يقول ليك بيتنا فيه (نخلة طويلة).

• واكتر حاجة مريحة في الوصف يقولوا تنزل محطة (العمودين).

• بالمناسبة أي حتة فيها محطة اسمها (محطة العمودين).

• ما يشوفوا ليهم عمودين متلصقات إلّا اطلقوا اسم المحطة عليهما.

• زي كأنو البلد دي ناقصة اسماء.

• زمان وقت كنا (طلبة) وكنا بنجي للخرطوم وقت نمشي ام درمان كانوا بقولوا لينا تركبوا المحطة الوسطي بالاربعين …ما تركبوا المحطة الوسطى بالموردة.

• والاتنين بودنك المحطة الوسطى.

• بس عشان يعذبوك.

• وعشان يرهقوك.

• وتقعد تفتش في (البصات) بقولوا ليك الكلام دا.

• وعشان الزول البوصف ليك يثبت ليك انو اخلص معاك.

• زي كأنو لو مشيت بشارع الموردة ما بكون اخلص معاك.

• في ناس بوصفوا كدا.

• اعمل ليهم شنو؟

• الشاي عندهم اساسي في الوصف.

• أي زول بوصف وهو لابس طاقية …بطلع الطاقية لمن يوصف ليك.

• ما عارف الحركة دي علاقتها شنو بالوصف.

• نحن هسع كبرنا – وعرفنا الحاجات دي كلها ما في داعي ليها.

• فلسفة ساكت.

• وعدم شغلة كمان.

• وفي قشرة كدا – وقت يقولوا ليك : بيت ناصية كبير قدامو (فسحة).

• الكلام دا طبعا قبل الكيزان ما يبيعوا (الفسحات).

• هسع ذاتو بقى ما في بيت ناصية.

• ما في كلام زي دا.

• ولا في بيت كبير.

• البيوت كلها مخنوقة – متل التاء المربوطة.

• المهم يا جماعة عشان ما اطول عليكم – وعشان المستعجل يطلع …الاهلي المصري هسع في مجموعته بقى واضح وظاهر.

• الاهلي المصري براهو في المجموعة الاولى زي (البيت الناصية).

• الكلام دا أنا ما قلتوا.

• ولا قاطعو من رأسي.

• هو أنا فاضي ليكم عشان اقطع ليكم من رأسي.

• تعالوا شوفوا الاخبار التى نشرت في المواقع بعد القرعة.

• قدر ما فتشت في المواقع ما لقيت لي سيرة للمريخ.

• في موقع كووورة نشر هذا الخبر ، بهذا العنوان : (الأهلي سعيد بقرعة دوري الأبطال).

• من الله خلقكم سمعتوا ليكم فريق بقول انه سعيد بالقرعة.

• غايتو يا ناس المريخ خربتوا لينا القرعة.

• نحن ناس الاهلي ديل وقت كانوا يعرفوا الهلال معاهم في مجموعة واحدة بيقعدوا يرجفوا السنة كلها.

• ما يخلوا ليهم فضائية او موقع ما يرجفوا فيه.

• هسع ناس الاهلي بقولوا سعداء بالقرعة.

• (تحدث سيد عبد الحفيظ، مدير الكرة بالأهلى، عن رأيه في قرعة دوري أبطال إفريقيا والمجموعة التي وقع فيها ناديه. وقال عبد الحفيظ، في تصريحات تلفزيونية لقناة أون تايم سبورتس: القرعة متزنة لحد كبير إلى جانب أن ترتيب المباريات جيد أيضا).

• انتوا عارفين يا ناس المريخ سيد عبدالحفيظ دا اصلو ما قاعد يقول ليه كلمة حلوة.

• معروف في مصر.

• دوره في الاهلي انه يطلع في الفضائيات ويصرح ويهاجم الجميع.

• اول مرة سيد عبدالحفيظ يقول ليه كلام سمح.

• خلوه سيد عبدالحفيظ ..تعالوا شوفوا مدرب المريخ الفرحان قال شنو؟

• لا عارفو فرحان …ولا عارفو شفقان.

• (مدرب المريخ لكووورة: طموحنا التأهل.. والأهلي المرشح الأول) دا عنوان خبر رئيسي.

• (قال الفرنسي ديديه جوميز المدير الفني للمريخ السوداني، أنه لا يشعر بأي نوع من الإحباط حول قرعة فريقه بمرحلة المجموعات لدوري أبطال أفريقيا).

• هسع في زول سألك من (الاحباط).

• الاحباط الجابو هنا شنو؟

• (وقال ديديه جوميز في تصريح لكووورة: لست محبطا من القرعة، فالأمر عادي، لكن في هذا الدور من البطولة تلعب الفرق بمستويات عالية جدا. سنقاتل لتحقيق أفضل النتائج).

• لا احسن تكون محبط.

• وانت شغال شنو؟

• ووصلت المجموعات كيف؟

• عشان تقعد تتكلم عن (الاحباط).

• جوميز مصر على (الانبراشة) ، وواضح عاوز يصلح علاقاته عشان يمكن يمشي مصر يمسك الشرقية للدخان او فريق شباب قنا.

• جوميز تابع وقال : الأهلي (المصري) هو المرشح الأول للتأهل من المجموعة، والمريخ مرشح لخطف إحدى بطاقتي ربع النهائي.

• في زول بقول كدا.

• انت مالك ومال الاهلي.

• ألعب كورتك بس.

• انت بتعمل في شنو؟ اذا وضعت منذ الان فريق الاهلي مرشح اول للتأهل من المجموعة.

• بالله شوفوا الزول (المنبرش) دا.

• عليكم الله هسع دا مدرب المريخ ام مدرب الاهلي المصري.

• وقت تجعلهم المرشح الاول في المجموعة ح تلعب معاهم كيف؟

• والله يا ناس المريخ – اسمعونا..دا الكلام ذاتو البجيب السبعات.

• في زول بمنح منافسو هذه (الثقة).

• ما تقولوا لي الزول داع عاوز يخدر ناس الاهلي ويخدعهم.

• ناس الاهلي ما بتخدروا ولا بخدعهم كلام زي دا.

• مثل هذا الحديث محسوب عليكم يا ناس المريخ.

• جوميز ما وقف عند هذا الكلام – تعالوا شوفوه تاني قال شنو؟

• (مدرب المريخ: مجموعتنا قوية.. والأهلي قادر على الاحتفاظ باللقب).

• كمان اتجاوز حكاية ان الاهلي هو المرشح الاول في مجموعتهم وقطع بان الاهلي سوف يحتفظ باللقب.

• علق الفرنسي ديدييه جوميز، المدير الفني للمريخ السوداني، على قرعة دوري أبطال إفريقيا، التي أوقعت فريقه مع الأهلي المصري وسيمبا التنزاني وفيتا كلوب الكونغولي. وقال جوميز، في تصريح لبرنامج جمهور الثالثة: “لم تتح لي الفرصة لمواجهة الأهلي في الدوري المصري، أثناء تدريب الإسماعيلي، لكن كنت أتابع مباريات الفريق تحت قيادة السويسري رينيه فايلر، المدير الفني السابق”. وأضاف: “الأهلي فريق قوي ولديه القدرة على الاحتفاظ باللقب للعام الثاني على التوالي، وذلك لما لديه من لاعبين”.

• يا زول اتكلم قدر لحافك.

• عاوز تجعل الاهلي هو المرشح الاول في مجموعتكم بطريقتك ..انت حر مع ناس فيتا وسيمبا ، لكن كمان عاوز تقطع بان الاهلي سوف يحتفظ باللقب فهذا ما لا نقبله.

• في اندية بتلعب.

• وفي ناس عارفين بعملوا في شنو؟

• اتكلم في حدود صلاحيتك.

• ما تنطط برة الدارة.

• مدربكم دا يا ناس المريخ مفروض تمشوا بيه (سيكافا).

• الزول دا المجموعات بي تصريحاته وانبراشاته دي ما بقدر عليها.

• خلاصة الكلام – العالم كله بتكلم عن ان مجموعة الاهلي المصري ساهلة وما فيه صعوبة.

• الاهلي ذاته تحدث عن هذا الامر – وممكن الاهلي يلعب المجموعات بالشباب.

• خاصة ان تصريحات المنافسين (منبرشة) شديد.

• شوفوا الفرق بين تصريحات مدرب الهلال وتصريحات مدرب المريخ : (أوضح مدرب الهلال السوداني، زوران مانولوفيتش، أنّ فريقه سيخوض مباريات صعبة بدوري المجموعات، مبينًا أنّه الوضع الطبيعي… وقال زوران في تصريحاتٍ صحفية، إنّ الهلال لا يقلّ عن مازيمبي وصنداونز وشباب بلوزداد، وسيلعب أمام بكلّ احترامٍ…وأضاف” سبق لي إقصاء مازيمبي ٢٠١٨ من ربع نهائي دوري أبطال أفريقيا عندما كنت مدربًا لأوّل أغسطس الأنغولي وأعرف صنداونز حيث واجهته في الموسم الماضي عندما كان مدربًا الوداد المغربي”…وأردف” شباب بلوزداد فريق جيد والقتال سيكون شعار الهلال في المجموعات”. وكشف زوران عن أنّهم سيقاتلون في دوري المجموعات وسيعملون على التجهيز بالصورة التي تجعله قادرًا على التأهل).

• والكبير كبير.

• ………..

متاريس

• في اخوة اعزاء فهموا من كلامه امس عن جلواك اني عاوز اشتمه او اهاجمه بصورة عنيفة شوية.

• ابدا …ما في كلام زي دا …محمد جلواك ..فنان مبدع ..ويجب ان لا يكون تقيمنا للأشياء من خلال الاتفاق او الاختلاف معها.

• ما اريد ان اقوله في موضوع جلواك انه تعرض لهجوم شرس ..ووجهت له اساءات بالغة ..مست حتى اسرته.

• الكلام دا ما صاح.

• نرد على جلواك بالمنطق وبعيد عن الاساءة له…خاصة انه زول فنان ومبدع وعنده بصمة.

• يمكن التعبير يكون خان جلواك .. ويمكن في ناس صعبة وما بتقبل في الهلال زي ما في ناس برضو ما بتقبل في المريخ.

• خلوا اخلاقكم رياضية.

• وما في حاجة بتستاهل.

• جلواك ذاتو وقع مع رمضان عجب ومحمد الرشيد وابوعشرين.

• يعني في التسجيلات القادمة ممكن يكون في (رديف) الهلال.

• وبرضو بنرجع لجلواك لاحقا ..بس ما عشان نتهكم عليه او نسيء ليه.

• يبقى بينا الاحترام.

• والتقدير.

• وهلال مريخ.

• ويا جلواك ما تزعل من زول ..ناس الرياضة صعبين شوية..لكن قلوبهم زي (اللبن).

• …….

• ترس اخير : التمهيدي الكتير مرات بعمل مشاكل في (البنكرياس).