الاشانتي والكورونا ومزمل ابوالقاسم وجلواك

صابنها

محمد_عبدالماجد

الاشانتي والكورونا ومزمل ابوالقاسم وجلواك

• لقيت لي مريخابي زعلان – عيونو طالعة من وشو متل (صينية الغداء) في المناسبة.
• ينتظروها عشرين واحد.
• قلت ليه الحاصل شنو؟
• مالك يا زول؟
• بقيت ضعيف كدا؟
• وفجأة كبرت.
• طبعا اسوأ حاجة – تلاقي ليكم زول يقول ليك (مالك كبرت كدا؟) – الكلام دا مفروض ما اقوله ليكم في العمود دا.
• لكن ما بدس منكم حاجة.
• احسن اكون معاكم صريح من البداية.
• ما في حاجة بتدس.
• المريخابي قال لي : أها اتأهلتوا كيف لمرحلة المجموعات؟ بالنقاط ام بالاهداف؟
• المريخابي سكت شوية كدا وقال لي وإلّا بي الضربات الترجيحية؟
• عاينت ليه سمح وقلت ليه اتأهلنا بي (الكورونا).
• المريخابي قال لي : دي قبل كدا ما سمعنا بيها.
• ممكن تتأهل بالنقاط.
• وممكن تتأهل بالأهداف.
• وممكن بالضربات الترجيحية.
• لكن بالكورونا دي اول مرة نسمع بيها.
• قلت ليه : والله الهلال الشايفو دا ما في حاجة تاني بتقيف قدامو.
• هلالنا دا من منازلهم بتأهل.
• المجموعات من غير ما نلعب بنتأهل ليها.
• انتوا عارفين الدنمارك في سنة 1992 شالت بطولة الامم الاوربية من غير ان تتأهل من التصفيات، منتخب الدنمارك لكرة القدم فاز بالبطولة، بالرغم من أنه لم يتأهل إليها بشكل مباشر.
• الزمالك لم يلعب ولا مباراة في مرحلة الـ 64 ومرحلة الـ 32 وأتأهل لمرحلة المجموعات.
• يعني واقفين على الهلال في مباراة بعد ان فاز على الاشانتي في غانا 1 / صفر.
• نهضة بركان في الكونفدرالية تم اعفائها من دور الـ 32 مكرر ..اتأهل للمجموعات طوالي.
• وناس مزمل ابوالقاسم الكلام دا ما عاوز يقع ليهم.
• ما قادرين يفهموا الحتة دي.
• يفهموه كيف ؟ اذا طلعوا من التمهيدي ثلاث مرات على التوالي.
• نقول لآخونا في المريخ وللدكتور الحبيب مزمل ابوالقاسم – (جلواك) خلوه لي عندو عمود براه.
• نقول لآخونا في المريخ سخرتم وطلعتم في جرايدكم بفرح كبير بسبب اصابة ياسر مزمل والطيب عبدالرازق بالرباط الصليبي – زي كأنو الموضوع دا فيه (خير) ليهم والمرض والإصابات ما فيها (شماتة) ، وكان بسبب هذه (الشماتة) ان اصيب افضل لاعب في المريخ ودرة الملاعب السودانية (التش) بالرباط الصليبي وتمزق في الغضروف.
• الهلالاب لم يعجبهم هذا ولم تخرج صحيفة بمناشيت عن الاصابة لتشمت في هذا الامر ، ومازال الهلالاب يتمنون شفاء التش وعودته سريعا للملاعب.
• جمهور الهلال في مواقع التواصل الاجتماعي تعامل مع الامر بشيء من العطف والوعي والدعاء الدائم للتش حتى يرجع معافيا للملاعب.
• المريخاب لم يتعلموا من هذا الدرس.
• المريخاب والدكتور مزمل ابوالقاسم ( الحبيب جلواك ابعدو لي منو – عندو عمود براه)… واصلوا سخريتهم من (كورونا).
• مزمل نسى القرعة ومسك في (الكورونا).
• متل الزول البيجي الخرطوم اول مرة – اول شيء بيسأل منو (جنينة الحيوانات) – الكلام دا زمان وقت كان عندنا (جنينة حيوانات) واسد ونمر وفيل.
• مزمل خلي أي شيء ومسك في (الكورونا) التى اصابت لاعبي فريق الاشانتي.
• ادم سوداكال الذي انصفته (الفيفا) بقى ما بجيب سيرتو.
• مزمل اتعاطف واستهجن من اصابة لاعبي الاشانتي بالكورونا وما جاب سيرة قبل ذلك لاصابة السمؤال ميرغني والطيب عبدالرازق بالكورونا عندما جاءت فحصواتهما في غانا (ايجابية).
• ديل يا ربي في غانا كانوا بمثلوا جيش كتشنر.
• لم يشكك مزمل في التقارير الطبية التى اثبتت اصابة السمؤال والطيب عبدالرازق بالكورونا.
• ما قال كلمة في الغانيين.
• قلت ليكم (جلواك) ولدنا عندو عمود براهو …هسع ما تدخلوه لي في الموضوع دا.
• العمود دا لمزمل ابوالقاسم براهو.
• المريخاب أي موضوع يمسكوا مزمل ابوالقاسم بقنعوا منو.
• اذا كان المريخاب بقنعوا – الهلالاب بعملوا شنو؟
• يفرحوا ساي.
• مزمل مسك ليك في ادم سوداكال فاز بالتزكية.
• زود العيار شوية الفيفا مددت ليه.
• دي جمال الوالي ما لقاها.
• جمال الوالي (14) سنة ما جاب من الفيفا غير العقوبات والغرامات للمريخ.
• سوداكال جاب ليكم من (كاس) بطولة الممتاز التى فشل فيها رمضان عجب وبكري المدينة ومحمد الرشيد وجمال الوالي.
• وسوداكال جاب ليكم من الفيفا (تمديد) لمجلسه.
• جلواك بمشي ليكم عليه ..خلوني هسع مع مزمل.
• ما عاوز ارجع ليكم لي وراء كتير ..لكن عاوز اسألكم عن رمضان عجب ومحمد الرشيد والذي اخترع مزمل فكرة (التمديد) لهما واكد ان المريخ لقى ليه حل لتسجيل عجب والرشيد.
• الجماعة ديل وين؟
• جلواك ما تسألوني منو هسع دي…اصبروا.
• ما تلخموني.
• التمديد فاز بيه سوداكال من الفيفا.
• وموضوع رمضان عجب ومحمد الرشيد لو وصل الفيفا ..تاني اسمكم بيكتبوه في (سبورة) دار الرياضة ام درمان.
• دوري الدرجة الثانية اليوم.
• مزمل مع اسامة عطا المنان اكد ان الفحوصات مضروبة وان الهلال يمكن ان يتعرض للكثير من المشاكل.
• اسامة عطا المنان بتاع مشاركة بكري المدينة بعد الاعتداء على الحكم صديق الطريفي في شندي.
• واسامة عطا المنان بتاع (التأشيرات) والتى رفع سعرها الى (300) دولار وهي سعرها لا يتجاوز الـ (60) الف دولار.
• المهم الهلال هسع بشارك في المجموعات وما في زول بجيب سيرة الاشانتي غير مزمل ابوالقاسم.
• ويمكن (جلواك).
• جلواك بمشي ليكم عليه.
• الاشانتي مشي دور (الترضية).
• تعالوا شوفوا ناس الاشانتي ذاتهم في صفحتهم على مواقع التواصل الاجتماعي قالوا شنو؟
• ناس الاشانتي بعضمة لسانهم قالوا شنو؟
• هذا الخبر حسب موقع كووورة.
• (اصدر نادي أشانتي كوتوكو الغاني امس السبت، بيانا جديدا تعلق بآخر التطورات المحيطة ببعثته التي عادت من السودان إلى غانا مساء الجمعة، وذلك بعد فشل فريق الكرة في خوض مباراته الثانية بدور الـ32 من دوري أبطال إفريقيا لكرة القدم، بسبب إصابة 8 من لاعبيه و4 من مسؤوليه بفيروس كورونا المستجد. وأكد النادي في بيانه الذي نشره على صفحته بفيسبوك إيجابية مسحة فيروس كورونا لـ 4 من مسؤوليه الإداريين، و4 لاعبين. وأوضح النادي أن المسحة الطبية أجريت بمطار كوتوكا الغاني فور وصول البعثة، وأن المجموعة المصابة تم حجزها لمعالجتها من الفيروس. وأضاف أنه من المهم ملاحظة أن 5 لاعبين من الذين زعم في السودان أن مسحتهم لفيروس كورونا، كانت إيجابية، ظهرت لاحقا نتيجة فحصهم سلبية في المستشفى العسكري السوداني وفي مطار كوتوكا. وألمح النادي في بيانه إلى اختلاف في الأسماء من اللاعبين والإداريين، وتضمن بيانه إشارات إلى إصابات أخرى جديدة غير تلك التي ظهرت في السودان، لكنه لم ينشر أسماء من أوراق رسمية للمعامل التي أجريت فيها المسحات).
• هسع البيان دا فيه سيرة لي جلواك.
• جلواك مالو؟
• اقصد فيه سيرة لمزمل ابوالقاسم.
• الناس ديل بعد ما سافروا ورجعوا الى بلدهم واجروا فحوصات (أكد النادي في بيانه الذي نشره على صفحته بفيسبوك إيجابية مسحة فيروس كورونا لـ 4 من مسؤوليه الإداريين، و4 لاعبين. وأوضح النادي أن المسحة الطبية أجريت بمطار كوتوكا الغاني فور وصول البعثة، وأن المجموعة المصابة تم حجزها لمعالجتها من الفيروس).
• في بلدهم حجزوهم.
• في بلدهم اكدوا اصابة 8 افراد.
• 4 لاعبين.
• و4 اداريين.
• براهم قالوا كدا.
• انسوا موضوع المخالطة …وموضوع ان الكورونا الليلة ممكن تظهر ليك (ايجابية) وبكرة (سلبية).
• عادي.
• وناس الاشانتي براهم قالوا عندنا 8 اصابات.
• مزمل رأيو شنو في الكلام.
• الاربعة لاعبين ديل الكورونا جاتهم من وين؟
• الخلاف هسع في كم لاعب يعني؟
• اذا كان الاشانتي من غانا جاء بـ 22 لاعبا.
• تقول ماشيين ليهم عزاء.
• الهلال سافر غانا بـ 26 لاعبا ..عشان الكلام دا.
• كلموا ناس الاشانتي يقدموا الفحوصات لمزمل ابوالقاسم – عشان …مزمل بطلعها ليكم كلها مضروبة.
• مزمل ح يقول ليهم الفحوصات التى اجريت ليهم في مطار كوتوكا اجراها ليهم كمال شداد.
• مطار كوتوكا ضارب.
• الغريبة مزمل ابوالقاسم لغاية الآن ما جاب سيرة كمال شداد في موضوع الكورونا دي.
• جلواك – عندو عمود براهو.
• مالكم انتوا عاوزين تعملوا لي وجع رأس؟
• اصبروا شوية على (جلواك).
• بيان الاشانتي إشار إلى إصابات أخرى جديدة غير تلك التي ظهرت في السودان.
• الكارثة الاكبر ان البيان والاشانتي بصورة عامة لم ينشر أسماء من أوراق رسمية للمعامل التي أجريت فيها المسحات والتى اكد فيها (سلبية) الفحوصات.
• نحن عاوزين نعرف بس الفحوصات دي اسامة عطا المنان عملها ليهم وين؟
• عاوزين نعرف اسم المعمل.
• بالمناسبة الهلال استفسر مستشفى علياء واكد ان الاشانتي لم يقم باجراء فحوصات عندهم.
• اسامة لعب في موضوع (التأشيرات).
• واسامة عطا المنان واضح انه لعب ايضا في موضوع (الفحوصات).
• والله يا جماعة (جلواك) الليلة ما عندي ليه مساحة.
• خلونا الليلة مع مزمل.
• جلواك ملحوق.
• ………….
متاريس
• عاوز اكتب ليكم برضو ان شاءالله عن مجموعة الاهلي المصري.
• اصبروا بس.
• خلونا نمشي خطوة خطوة.
• ما في حاجة بتفوت.
• بكرة بنرجع للقرعة ان شاءالله.
• هسع اقول ليكم صبت مطرة.
• المطرة دي جبتها من وين؟
• والله ما عارف.
• ……
• ترس اخير : خلاص موضوع المطرة دي لو زعلتكم شيلوها من العمود.