الهلال في مجموعة الموت والأهلي المصري في مجموعة (الحياة) !!

قزاز ورذاذ

محمد الطيب الأمين

الهلال في مجموعة الموت والأهلي المصري في مجموعة (الحياة) !!

* نفس (الونسة) الموجودة في مواقع التواصل الإجتماعي بالسودان هي موجودة في تركيا وماليزيا والصين .
* زي ما نحن عندنا أولاد بخشوا الفيسبوك بأسماء بنات ، في نيجيريا برضو في نفس الحركة .
* وفي الأردن واليمن والصومال وبلجيكا والنمسا .. الحاجات دي موجودة .
* عندهم قروبات وصفحات .
* عندهم زول زي مدني عباس مدني وعندهم زولة زي عشة الجبل ، مع إختلاف الأسماء طبعاً .
* وبما أن ذلك كذلك فإن مواقع التواصل في جنوب أفريقيا تتحدث عن أن صنداونز وقع في مجموعة (الموت) .
* في الجزائر مواقع التواصل تتحدث عن أن بلوزداد وقع في مجموعة (الموت) .
* في الكنغو مواقع التواصل تتحدث عن أن مازيمبي وقع في مجموعة (الموت) .
* في السودان مواقع التواصل تتحدث عن أن الهلال وقع في مجموعة (الموت) .
* ولما تقول مجموعة الموت معناها كل عناصر المجموعة منهم خوف .
* مجموعة موت يعني مجموعة ما فيها ضعيف وإلا لما سُميت مجموعة الموت .
* لشنو ما قالوا مجموعة الأهلي المصري مجموعة الموت .
* ليه ؟
* لأنها ما مجموعة موت .
* إذا كانت مجموعة الهلال هي مجموعة الموت فإن مجموعة الأهلي المصري هي مجموعة (الحياة) .
* والله صحي .
* مجموعة ما فيها غير الأهلي.
* وتعال أناقشك.
* والله أنا ما عرفت إنو سيمبا التنزاني بيلعب في الأبطال إلا بعد اذاعو القرعة .
* قلت يمكن الناس ديل لخبطوا بين قرعة الأبطال الكونفدرالية .
* لكن بيني بينك دوري الأبطال السنة دي زادو موية .
* أول ما المريخ اتجاوز التمهيدي أنا عرفت إنو دوري الأبطال زادو موية .
* البطولة بقت لامة لينا (أطفال أفريقيا) .
* دي ح تكون أبيخ نسخة في تاريخ البطولة .
* كل الأندية الكانت بتتساقط من التمهيدي السنة دي ما سقطت .
* وعلى رأسهم المريخ وسيمبا .
* غايتو الأهلي المصري عندو حظ غريب .
* لو كنا محل الأهلي المصري بندخل المجموعات بدون إعداد.
* معقولة سيمبا في المجموعات وكمان المريخ وفيتا.
* أخطر لاعب في فيتا كلوب هو السوداني محمد المصطفى .
* ده المهاجم الأول بالفريق .
* كان بيلعب في الخرطوم الوطني .
* نحن ما بنقلل من شأنه ولكنه في نهاية الأمر هو زيو وزي وليد الشعلة .
* المهم .
* أنا واحد من الناس سعيد جداً بهذه المجموعة .
* ده مقام الهلال يا جماعة .
* ده حجم الهلال الطبيعي .
* كل الفرق خايفة مننا فلماذا نخاف من ناس خايفة .
* للفنان عصمت بكري أغنية بتقول :
اطمئني ما بقيف قدام سعادتك
وما بتشوفي الشينة مني
غير أريدك ما يزيدك
مهما تخفي الريدة عني
وخايفة من زول ذاتو خايف
من هواك الما بهني
* نحن ما بنخاف من ناس خايفة مننا .
* لو هو مازيمبي نحن الهلال.
* لو هو صنداونز نحن الهلال .
* كبار قامة وقيمة.
* نتقابل حداشر مع حداشر والفيهو طيب بنشم.
* ما في أجمل من المجموعة .
* حديد لاقي حديد .
* لما أفريقيا كلها تقول مجموعة الهلال هي مجموعة الموت معناها ده اعتراف بأن الهلال مخيف بالنسبة لكل أفريقيا.
* أحلف ليك لو القرعة أوقعت المريخ ومازيمبي وصنداونز وبلوزداد في مجموعة واحدة ما كان ح يقولوا مجموعة الموت .
* مجموعة الموت تعني أن الأربعة (نار) .
* الهلال يجب أن يكون على قدر التحدي .
* صدقوني الهلال ما ناقصو شئ .
* ٣٠ لاعب على درجة عالية جداً من المهارة والقوة البدنية.
* عندك الغربال وأبو عاقلة وجيسي .
* التلاتة ديل خاناتهم فاضية في أي فريق في أفريقيا.
* في الأهلي المصري خانة أبو عاقلة فاضية .
* محمد عبد الرحمن يمشي بلوزداد يدخل التشكيلة بدون يتمرن.
* جيسي يلعب في تشكيلة مازيمبي وهو مصاب .
* كل الأندية العربية كانت ساكة فيني وعلى رأسهم الزمالك .
* الخامات الموجودة في الهلال من أفضل الخامات في أفريقيا والوطن العربي .
* شوية تناغم وما في زول بقيف قدامنا .
* لو شداد سمح بزيادة عدد المحترفين خير وبركة ما سمح برضو خير وبركة .
* فيني وجيسي لم يلعبا منذ شهر رمضان الماضي .
* من قبل رمضان .
* واقفين سنة إلا شهر بسبب كورونا .
* والآن يسيران في الإتجاه الصحيح .
* جيسي سيكون حديث أفريقيا في هذه النسخة وكذلك فيني .
* نرحب بهذه المجموعة ونقول على بركة الله .
* فقط نطالب دكتور شداد أن يرفع عدد الكشف ل٤٠ كما كشف الكاف حتى لا نتضرر من كورونا .
* وهذا موضوع سنعود له لاحقاً
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* والكبير كبير .