نحن من كترة تعودنا على (المجموعات) بقينا نتأهل بدون ما نلعب

صااااااابنها

محمد عبدالماجد

نحن من كترة تعودنا على (المجموعات) بقينا نتأهل بدون ما نلعب

• في حاجات غريبة بتحصل في الدنيا دي.
• نحن عندنا (مروحة) عشان تشتغل ليك إلّا تجيب ليها (لبن).
• تقول (كديسة).
• رطل اللبن بقى 100 جنيه…نحن اللبن نجيبو للشفع وإلّا للمروحة؟
• لكن اقول ليكم مع الكهربة الطارت السماء …المروحة افضل لينا تشتغل باللبن من ان تشتغل بالكهربة.
• هسع موضوع (المروحة) دي ما في مناسبة ليه.
• احسن ادخل لينا في الموضوع طوالي.
• انتوا الحكام ديل اجسامهم مصفحة؟
• عمري ما سمعت بي حكم عندو كورونا.
• ولا حتى حكم راية.
• قبل سنوات – الواحد ذاتو بقى ما بتذكر كويس ، اذكر اني كتبت تحت عنوان (المجموعات فيها كراع غريبة).
• عندما تأهل المريخ مع الهلال الى مرحلة المجموعات.
• الناس ديل التأهل لمرحلة المجموعات عندهم زي (كسوف القمر).
• ما بحصل بالساهل.
• الوقت داك المجموعات كان فيها 8 اندية فقط ، كل 4 اندية في مجموعة.
• ما زي مجموعات الايامات دي فيها 16 فريق.
• مع ذلك المريخ تأهل لمرحلة المجموعات في هذا الموسم ، بعد ان ظل يخرج من مرحلة التمهيدي لمدة ثلاث مواسم متتالية.
• والبيطلع من التمهيدي بتخلعوا المجموعات.
• الجماعة ديل من التمهيدي الكتير لمن بقوا يتشابهوا.
• بقوا كلهم واحد.
• زي (التعاريف).
• الشيء الغريب ان المريخ سبق ان عسكر في قطر ولعب وديا امام بايرن ميونخ ايام جمال الوالي.
• مع ذلك جاء المريخ وخرج من امام كمبالا سيتي.
• عادي الكلام دا يحصل في المريخ.
• قالوا لاعب بايرن ميونخ السابق الهولندي (روبن ) بدّل قميصه مع لاعب المريخ السابق موسي الزومة…وقت عرف المريخ طلع من التمهيدي استرجع (قميصه) بي الـ (دي اتش ال).
• بي لجنة الانضباط في الاتحاد الافريقي.
• الكورة دي غريبة.
• وقت اوضاع المريخ (المالية) كانت ممتازة وكانوا بيعسكروا في قطر وانطاليا وبيلعبوا امام بايرن ميونخ وشالكة كانوا بطلعوا من (التمهيدي).
• ووقت ناس المريخ يتلملموا من السوق الشعبي بتأهلوا للمجموعات.
• كورة ما عندها منطق.
• ولا عندها ذوق.
• ولا بتعرف كبير.
• المريخ لم يعرف ان يتأهل للمجموعات في وجود التش ورمضان عجب ومحمد الرشيد وابوعشرين وتأهل المريخ الآن في وجود كرنقو وسيف تيري ومنجد النيل وطبنجة.
• والله كورة غريبة.
• عشان كدا بقول للهلالاب ..ما تعاينوا للأسماء الكبيرة الموجودة في الهلال الآن ..الكورة ما بتعرف الاسماء.
• ومرات كمان ما بتعرف الاجهزة الفنية.
• ولا بتعرف المعسكرات الخارجية.
• الكورة دي اصلها ما مضمونة.
• يمكن تديك …وانت ما عندك شيء.
• ويمكن تحرمك بعد ان تعطيها كل شيء.
• اصلو ما عندها ثوابت.
• تنططوا في (عيونكم) متل حبل الغسيل يوم الجمعة.
• الحمدلله السودان بقى عنده فريقين في المجموعات.
• الهلال والمريخ في المجموعات.
• والله كلام.
• في فريق المجموعات جديدة عليه.
• غريبة عليه.
• اعملوا حسابكم المجموعات ما تلخبط عليكم.
• الزول وقت يكون ما متعود على الحاجة ممكن تغلط عليه.
• الهلال اتعود على المجموعات شديد.
• زي البيت البتمشي ليه كتير.
• فجأة تكون ماشي تلقى نفسك قدام البيت.
• ومرات تلقى نفسك في (المطبخ).
• اتعودنا على المجموعات.
• كل سنة في المجموعات.
• من كترة التعوّد على مرحلة المجموعات …من غير ما بنلعب بنلقى نفسنا اتأهلنا لمرحلة المجموعات.
• المجموعات زي ما بقول الكابتن الكبير وهداف الممتاز لخمس مواسم متتالية معتز كبير بقت عند الهلال (عادات وتقاليد).
• زي ما في ناس عندهم الخروج من التمهيدي (عادات وتقاليد) ..في ناس المجموعات عندهم (عادات وتقاليد).
• ناس الغربال يتعبوا في شنو؟
• قاعدين في غرفة الملابس الهلال اتأهل.
• ما في داعي للتعب.
• ما في داعي للإرهاق.
• بنتأهل.
• بنتأهل.
• ولا بنتلفت.
• طوالي بنلقى روحنا في المجموعات.
• وكمان ح نصنف في المستوى الثاني.
• في ناس مع التعب دا ح يتصنفوا في المستوى الرابع.
• لو جاملوهم كدا بتم تصنيفهم في المستوى الثالث.
• الهلال معاقب.
• الهلال محروم من الجمهور.
• الهلال ما بيلعب.
• وبرضو الهلال يتأهل.
• التأهل عند الهلال ليس انجاز.
• هذا امر اعتدنا عليه.
• ماذا بعد التأهل للمجموعات.
• على الهلال ان يخطط لتجاوز مرحلة المجموعات.
• بل على الهلال ان يعمل من اجل ان يتصدر مجموعته.
• لا يهمنا مع من يلعب الهلال في مرحلة المجموعات.
• شخصيا اتمنى ان يكون فريق الاهلي المصري ضمن اندية مجموعة الهلال.
• علما ان الاهلي المصري سوف يجتهد ويعمل كل شيء من اجل ان لا يكون ضمن مجموعة الهلال.
• الاهلي المصري طبعا هو النادي الافضل في افريقيا في الوقت الحالي.
• هذا امر مفروغ منه.
• مع ذلك نتمنى وجود الاهلي في مجموعة الهلال.
• اندية شمال افريقيا تراجعت بشكل كبير في السنوات الاخيرة.
• الترجي التونسي لم يعد هو الترجي وقد كان الترجي قريبا من الخروج امام الاهلي الليبي.
• الوداد رغم الانتصار الكبير الذي حققه على الملعب المالي إلّا ان مستواه يبقى عادي.
• فريق الصفاقصي التونسي خرج من البطولة الافريقية الاولى وتحول بامر الفريق شباب بلوزداد الجزائري الى الكونفدرلية.
• فريق الرجاء غادر البطولة الافريقية الاولى بعد اللعب امام فريق تونغيت السنغالي لاول مرة يشارك في البطولة الافريقية.
• مازيمبي لم يعد مازيمبي …كما ان الهلال تخصص في فريق مازيمبي ..ان لم يكن الاهلي المصري ضمن مجموعة الهلال نتمنى مازيمبي.
• مازيمبي بالاسم.
• فريق صن دوانز يمكن ان يكون الافضل من بين الاندية السمراء التى تأهلت لمرحلة المجموعات.
• فريق سيمبا التنزاني يعتبر هو الاخر من الاندية الخطيرة في هذا الموسم.
• سيمبا ايضا يدعم بقوة جماهيرية كبيرة وهي تشكل اضافة قوية للفريق.
• قوة الهلال في مرحلة المجموعات تتمثل في زوران باعتباره خبير بالكرة الافريقية …كرة شمال افريقيا وكرة غرب افريقيا.
• زوران يمنح الهلال قوة كبيرة في مرحلة المجموعات.
• مرحلة المجموعات سوف تجرى قرعتها في الغد في القاهرة والتى سوف تنطلق مبارياتها في 13 نوفمبر القادم .
• امام الهلال اكثر من شهر قبل انطلاق مرحلة المجموعات ..وهذه فترة كافية لأن يصل الهلال الى المستوى المطلوب من خلال مباريات الدوري الممتاز.
• كذلك سوف تكون امام الهلال فرصة ذهبية لاضافة عناصر جديدة في التسجيلات القادمة لتساعد الهلال في مشواره الافريقي.
• على الهلال ان يخطط جيدا وان يعمل بجد وكد من اجل ان يحقق المطلوب.
• الاندية الموجودة الآن في مرحلة المجموعات اندية عادية …وليست هي اندية خطيرة.
• الخطورة يمكن ان تكون في ثلاثة او اربعة اندية بالكثير يمكن ان يكون هناك صداما بينها.
• كذلك يمكن ان تشكل (الكورونا) خطرا على الهلال وان كان فريق الهلال سوف يكون الفريق الاقل تضررا منها لأن الهلال يملك 30 لاعبا كلهم في مستوى واحد.
• الهلال اذا اضاف في التسجيلات القادمة محترفين اثنين يمكن ان تكبر حظوظه بصورة كبيرة في الفوز باللقب.
• يحتاج الهلال الى مهاجم (صاقعة) …الى جانب الغربال والشعلة وعيد مقدم.
• لا خوف على الهلال.
• تأهلنا في ظروف صعبة وبفريق بدل جلده تماما …وتجاوزنا الكورونا وعقوبات الكاف وسوف ندخل لمرحلة سوف نكون فيها الاكثر جاهزية والاكثر استعدادا.
• نتمنى ان يبقى كشف الهلال خاليا من الاصابات وان يكتمل شفاء ابوعشرين والغربال.
• كذلك ننتظر اضافة الدالي في التسجيلات القادمة الى جانب ياسر مزمل الذي نسأل الله ان تكتمل مراحل شفائه سريعا.
• دعونا ندخل للمرحلة القادمة ونحن اكثر ثقة.
• على الهلال ان يمنح مباريات الدوري الممتاز القادمة الاهتمام والعناية الكافية.
• اعيدوا الثقة لجمهور الهلال.
• وارجعوا الى ما هو متوقع منكم.
• الله معاكم.
• ………
متاريس
• متي يحقق المريخ نتيجة ايجابية خارج الديار.
• اكتر حاجة ممكن يعملوها يسجلوا هدف خارج الديار.
• ما هو اخر فوز حققه المريخ خارج الديار.
• وما هي اخر خسارة للهلال خارج الديار.
• الهلال فاز على الاشانتي في معقله ….البخلينا نخاف منه شنو في ام درمان.
• لو المباراة اقيمت كان هداف البطولة ح يطلع من الهلال.
• منير يونس ود نوباوي كان ممكن يكون هداف البطولة.
• سيف تيري هو المستفيد الاول من الغاء المباراة.
• مزمل ابوالقاسم الليلة مفروض يكتب عموده بالفرنسي …اتأهلوا للمجموعات.
• سوداكال (شفت) اهدي التأهل لجمال الوالي….عشان جمال الوالي عندما كان رئيسا للمريخ لم يكن المريخ يعرف طريقا الى المجموعات.
• …….
• ترس اخير : الزول وقت يكون جديد في المجموعات …اتوقعو منه أي شيء.