جيب ولي امرك وتعال..!!
سوبر هاتريك
طارق محمد عبد الله
جيب ولي امرك وتعال..!!
& غاب سيد البلد في مهمة وطنية ولأنه الكبير والأمير كان لابد له أن يعود ومعه هدية لشعب مامل الرهان عليه ترك الكرونا وغيرها وبات حديثه هلال يتكلم هلال يتنفس هلال ولأنه الالق والجمال وقبل أن تصل بعثته الظافرة لارض الوطن بالسلامة سبقها جواب مرسل للبلد بداخله رسالة حب مغلفة باريج الانتصار الفواح بهدف فيني والذي جعل البلد في حالة حبور وارتياح من المساء حتى الصباح .
& تعددت الجوابات المرسلة للبلد واذا كان الاول من إمضاء ولمسات فيني والاسم الثلاثي للكنغولي صعب عشان كده خلونا منو هسه ونركز مع اللدغه الأولى والتي حملت عنوان أول الغيث قطرة وبحول الله ستنهمر اهدافي والحديث للكنغولي الرهيب في شباك المنافسين واذا كان لقب محمد عبد الرحمن هو الغربال فإن فيني يستحق لقب( الجلاد )يعني تاني اي مدافع ميدو (يغربلو) وفيني (يجلدو )وعيد مقدم يقول ليهو( امشي جيب ولي امرك وتعال) وطبعا الزوغه الياها في عاقل بيواجه مثلث الرعب ده ؟؟؟؟ والكلام ليك يانمر يالمنطط عينيك احسن تشوف ليك عقد عمل وتعمل رايح هسه الجاب نمر هنا شنو ؟؟؟
& اماالجواب الثاني المرسل للبلد من طرف ولدنا أرنق فحواه نوموا قفا الهلال بمن حضر وكل زول ما شاف وزير الدفاع طارق ونجم النجوم امين ذكي يشوف أرنق شكرا الاسمراني الجميل الراقي والسؤال من أين لك كل هذا البهاء والألف والتوهج والضياء ماشاء الله ؟؟؟ وعشان الواحد مايكتر الكلام من اي كوكب انت ايها الأرنق الجميل النبيل الأنيق؟ ؟؟
& و الجوابات المرسلة للبلد كثيرة وفيها زوران يؤكد أنه شفت بالجد وكل ما يحتاجه منا الصبر الجميل وصدقني مع الخواجة ابو عيون خضراء ده عزيزي المشجع الهلالابي موش حتقدر تغمض عينيك وانت موعود باذن الله بهلال غير غير .
& وبطبيعة الحال فقد اثلجت رسائل الشغيل جمل الشيل والاسد ابو عاقلة الصدور وجعلتنا نهتف ملء الحلق في حبور الهلال (ياكده يابلاش )اما فارس الحوبه والنزال فقد أثبت انه نسيج ابداعي متفرد لاشبيه ولانظير له الا ظله هذا على اليسار اما على الطرف اليمين فقد توهج الرزين الهاديءمؤيد عابدين والذي لم يتهيب التجربة ولعب بثقة وثبات وفات الكبار والقدرو كمان (كمان )
& ومن العناوين الابرز محمد واتارا وبمجرد ذكر اسمه فإن الكلام كلو كمل ولكم الخيار في اختيار أحد السدين ام العالي او النهضة لقبا لعملاق الدفاع الأزرق ..؟؟
& نشيد بابداعات بوغبا وان كنا نطمع في المزيد ولنا بعض عتاب لنيزو على غرار زيزو متي تعود نزار حامد الذي نعرف ومتي تكرر هدفك الأسطوري في شباك سموحه ؟؟ وعلى ذكر النادي المصري كل الامنيات بالتوفيق لولدنا أطهر بأرض الكنانة
& واخ اخ ياود الضي لو أحرزت هدفا من الفرص التي أهدرتها لارسل الأشانتي بدوره جواب مرسل للبلد أعلن فيه انسحابه من لقاء المقبرة جراء إصابات متعددة بصفوفه ولكن الجايات اكثر باذن الله .
اهداف سريعة ..اهداف سريعة
& رسالة عميقة حملتها هرولة فيني نحو زوران واحتضانه عقب الهدف الجميل .
& واخرى اكثر عمق جسدها الاحتفاء المتبادل بالهدف مابين الصانع الماهر ابو عاقلة وفيني .
& والرسالة الثالثة لو استمرت الروح الجميلة السائدة الآن بالهلال والتي تعكس التعاون والتعاضد لا خوف على ابو الهل في البطولة الإفريقية.
& ورسالة خاصة للشعب الأزرق المحب للهلال والجمال امانه الصبر ماطيب دعوا زوران يعمل في هدوء وسنجني جميعا الثمار حلوة المذاق باذن الله .
& هلال قيافه وفايت الناس مسافه .
& ازرق وابيض لون الفل هلال القمة حبيب الكل .
& ويظل الهلال الرقم الصحيح بالكرة السودانية وغيره الكسور والبواقي .
& واخيرا احمد الله كثيرا انني حي ازرق .
