بالعربي الكسيح
محمد الطيب الأمين
المفروض يمد (يدو) أطول من كده !!
* قبل سنوات بعيدة وعندما قررنا أن نأتي الخرطوم أهلنا هناك حذرونا من (7) حاجات (5) هي: (التجار وشارع الظلط وبنات الخرطوم) ..
* حذرونا من السبع حاجات دي ..
* قالوا لينا أعملوا حسابكم من شارع الظلط لأنو العربيات في الخرطوم كتيرة ..
* الواحد بقى لما يجي يقطع شارع الظلط بيشوف ليهو زول قاطع عشان يقطع معاهو الظلط ..
* حذرونا من بنات الخرطوم ..
* قالوا لينا بنات الخرطوم عندهن قروش وبيشربن شيشة وبيشاغلن الأولاد ..
* الواحد فينا بقي لو شاف ليهو بت من بنات الخرطوم يقرب يقول ليها (ما عندك ولعة) ؟
* جينا البلد دي واتعاملنا مع بنات الخرطوم وشارع الظلط بحذر شديد ..
* حذرونا من التجار ..
* قالوا لينا التاجر في الخرطوم لو قال ليك القميص ب(40) جنيه تديهو عشرين جنيه بس..
* وصلوا لينا احساس انو التجار والبنات وشارع الظلط في الخرطوم حاجة واحدة ..
* نفس الخطورة..
* عندنا واحد جا الخرطوم جديد ومشى يشتري اسكراتش ..
* قال لبتاع الاسكراتس : الاسكراتش أبو عشرة بي كم ؟ قال ليهو بي عشرة .. صاحبنا قال ليهو لا لا يا زول بي خمسة بس ..
* بي خمسة وما بي خمسة والمشكلة دورت ..
* صاحبنا ناس البلد حذرو من التجار وقالوا ليهو أي سعر يقولو ليك التجار في الخرطوم اقسمو النص ..
* وجا طبق وصية الأهل في الاسكراتش ..
* والمشكلة دورت ..
* أصلاً معروف بين البايع والمشتري يفتح الله ..
* لكن في تجار ما بيعرفوا (يفتح الله دي) ، لو قلت ليهو سعر ما عجبو ممكن يسمعك كلام فارغ ..
* وممكن يعاين ليك عين فيها احتقار عجيب ..
* مع إنو ممكن يقول ليك (يفتح الله) ..
* يفتح الله كلمة حنينة وفيها كثير من الراحة والقبول والرضا ..
* وبما أن ذلك كذلك فنحن لا نعرف هل بين مريخ العرضة والمريخ الفاشر يفتح الله ؟
* شخصياً ما عارف الناس ديل بينهما يفتح الله ولا ما بينهما ..
* لكن بعض أهل المريخ وبعض الأخوان في الفاشر كانوا يتحدثون عن إن هنالك (يفتح) الله ..
* في مواقع التواصل الإجتماعي يتحدث البعض عن عملية بيع وشراء ..
* وفي مريخاب قالوا إنو لعيبة المريخ (مخترقين) ..
* إختراق عديل ..
* بالمناسبة.. الاختراق ده عندو علاقة بالهكر ولا بتخيل لي ساكت؟
* الحقيقة والله أنا ما عارف منو مشتري من منو ؟ ومنو بايع من منو ؟ والمخترق منو ؟ ومن هو الخارق ؟
* ما فاهم ..
* ناس يقولوا جمال سالم المفروض يمد يدو أطول من كده، وناس قالوا إنو جمال سالم أصلا يدو كده ..
* بهناك قام محمد الشيخ مدني استقال وكتب في حيثيات الاستقالة انو كرة القدم تلعب خارج الملعب ..
* كلام كتير ..
* محمد الشيخ مدنى نسى أن المريخ المشهور ب(المدفور) وعلى مر التاريخ النقاط الشالها من المكتب اكتر من النقاط الشالها من الملعب ..
* لو كرة القدم بتلعب في الملعب المريخ السنة دي بالذات ما كان بيلم في المركز الخامس ..
* المريخ وصيف بالمكتب ما بالملعب ..
* وهو محمد الشيخ مدني ذاتو جا المريخ كيف ؟
* جيت كيف يا أبو القوانين ؟
* جابتك إنتخابات حرة ونزيهة مثلا!!
* محمد الشيخ جابتو الحكومة وعشان يقعد في الكرسي قرر يستلم النادي والمكتب التنفيذي بواسطة القوة الشرطية ..
* جا علي حساب مجلس شرعي ورئيس منتخب ..
* جا المريخ بي (تحت تحت) ..
* جا المريخ بواسطة المكتب ..
* ولذلك على محمد الشيخ مدني أن يساعدنا بالسكات ..
* قول الشغلة غلبتك، أو قول داير تطلع عشان يجي جمال الوالي..
* الحنك ده نحن عارفنو ..
* المهم ..
* اليوم الرياضة السودانية على المحك ..
* اليوم تنظر اللجنة في شكوى المريخ ضد المريخ علماً بأن الشكوى مرفوضة شكلاً..
* اليوم إذا كسب المريخ شكوته سنقيم مأتم وعزاء مفتوح للكرة السودانية وللأخلاق الرياضية ..
* إذا كسب المريخ الشكوى فهذا سيقود مجموعة من الأشخاص لقفص الإتهام الصارخ ..
* حتى مريخ الفاشر لن يسلم من التهم ..
* كسب الشكوى يعني بالفعل أن هنالك تلاعب قد حدث بين المريخين ..
* نغلبكم في الميدان ونشرك ليكم لاعب موقوف واشتكونا وشيلوا النقاط ..
* طيب المقابل شنو ؟؟
* أنا شخصياً استبعد هذا الأمر ..
* وأثق في أخلاق ناس الفاشر وفي مريخ الفاشر ..
* مستحيل يعملوا كده ..
* ثقتنا فيهم شركة ..
* فقط ننتظر اللجنة ماذا تقول ..
* هو عليك الله ناس المريخ ديل ح يخجلوا متين ..؟
* لا خجل لا حياء ..
* فريق مضروب جوة الملعب يجري يفتش في المكتب ؟
* اخجلوا ياخ ..
* ست نقاط شالوها من الهلال وترتيبنا في الدوري خلفكم وسافرتو الفاشر والكأس معاكم في الطيارة وبعد ده كلو فشل وخيبة ..
* انتو لشنو ما بتحسوا .. ؟
* والله أنا مستغرب ما بتحسوا ليه ؟؟
* معقولة فريق يكون ما عندو شخصية للدرجة دي ؟
* سبحان الله ..
* لا شخصية ولا خجل ولا إحساس ولا مستوى ..
* غايتو الله يكفينا شر (المصدي) اللمعتو الأيام ..
* و..و..
* وجينا بعد الفرقة نسأل …. (جمال سالم يدو طويلة ولا خفيفة) ؟؟